Mádeniet jáne sport ministrligin 2 vedomstvoǵa bólý qajet pe? Dál osy suraqqa búgin Ortalyq kommýnikatsiialar qyzmeti alańynda QR Mádeniet jáne sport ministri Aqtoty Raiymqulova jaýap berdi, dep habarlaidy QazAqparat.
«Bizde mádeniettiń de, sporttyń da bar ekendigin maqtan tutamyn. Bul ánuranymyzdy oinatyp, týymyz kókke kóteretin salalar sanalady. Búgingi kúni mádeniet qairatkerleri de, sport qairatkerleri de Qazaqstannyń bai mádenietiniń tamasha úlgilerin, sportshylarymyzdyń airyqsha jetistikterin tanytý úshin eńbek etip júr. Sondyqtan qazirgi ýaqytta bul eki salanyń bir ókiletti organ quramynda bolǵany oryndy», - dedi ministr BAQ ókilderiniń saýalyna orai.
Sonymen qatar ol qazaqstandyq sportshylar men ártister arasynda koronavirýs indetin juqtyrǵandar joq ekenin atap ótti.
«Mende mundai aqparat joq. Sportshylarymyzdyń da, ártisterimizdiń de deni saý bolyp, óz qyzmetin odan ári jalǵastyra beredi dep senemin», - dedi Aqtoty Raiymqulova.
