Elorda turǵyndaryn vaktsinalaý naýqany qyzý júrip jatyr. Osy oraida mádeniet qyzmetkerleri men qoǵam qairatkerleri immýndaýdan ótti, dep habarlaidy "Ult aqparat" qala ákimdiginiń resmi saityna silteme jasap.
«Tolyq tekserildim jáne vaktsinany esh qorqynyshsyz aldym. Qýanyshyma orai bári jaqsy, ózimdi oidaǵydai sezinemin. Óz densaýlyǵyńyzǵa jaýapkershilikpen qarap, vaktsina alýǵa shaqyramyn», - dedi Nur-Sultan qalasy ákimdigi memlekettik akademiialyq filarmoniiasynyń klassikalyq jáne estradalyq vokal bóliminiń kórkemdik jetekshisi Arailym Rahym.
Aita ketý kerek, vaktsinatsiia – ujymdyq immýnitetti damytýdyń jáne koronavirýstyń elde taralýyn toqtatýdyń jalǵyz tásili.
«Men elorda turǵynymyn. Ǵylym salasynda jumys isteimin. Sondai-aq, kópbalaly otbasymyn. Balalarym men jaqyndarym jáne ózim úshin ekpe aldym. Elorda turǵyndary men qonaqtaryn, jalpy halqymyzdy vaktsina alýǵa shaqyramyn. Tumshalanyp júretin maskany sheshetin ýaqyt keldi», - dedi «Qasietti Qazaqstan» ǴZO jetekshisi Batyrhan Jumabaev.
«Vaktsinany sáýir aiynda aldym. Bári jaqsy ótti, eshqandai aýyrsyný bolǵan joq. Týystaryńyzdy, balalaryńyzdy, ata-analaryńyzdy, ata-ájelerińizdi jáne jaqyn dostaryńyzdy qorǵaý úshin COVID-19 vaktsinasyn qabyldaýǵa shaqyramyn. Aman bolyńyzdar!» - dedi elordalyq tsirktiń manej inspektory Joldasbek Imashev.
Aita keteiik, densaýlyq saqtaý basqarmasynyń málimetinshe Nur-Sultanda vaktsinanyń birinshi komponentin 308 myńnan astam adam aldy.
187 myńǵa jýyq qala turǵyny tolyq immýndaýdan ótti.
Esterińizge sala keteiik, buǵan deiin Nur-Sultan qalasynyń ákimi Altai Kólginov pen qalanyń bas sanitar dárigeri elordalyqtardy COVID-19-ǵa qarsy vaktsinatsiiadan ótýge shaqyrǵan bolatyn.
