Foto: gov.kz
Lombardtan alynǵan qaryz ipoteka nemese bank nesiesin alýǵa tikelei kedergi bolmaidy. Alaida ol qarjy uiymynyń sheshimine eleýli áser etýi múmkin. Bul týraly Qarjy naryǵyn retteý jáne damytý agenttigi málimdedi, dep habarlaidy Ult.kz.
Agenttik túsindirgendei, bank nemese mikroqarjy uiymy ótinimdi qaraý kezinde qaryz alýshynyń qarjylyq jaǵdaiyn, tólem qabilettiligin jáne kredittik tarihyn jan-jaqty baǵalaidy. Osy kezde lombard aldyndaǵy bereshek te basqa nesielermen qatar esepke alynady.
Eger qaryz alýshynyń lombardta merzimi ótken bereshegi bolsa, bul ipotekanyń maquldaný múmkindigin aitarlyqtai tómendetedi. Sebebi mundai qaryzdar kredittik biýrolarǵa tirkeledi jáne borysh júktemesin esepteý kezinde tolyq eskeriledi.
Sondai-aq lombardtaǵy qaryz ýaqytynda ótelmese, kepilge qoiylǵan múlik keminde 30 kún saqtalady. Osy ýaqyt ishinde qaryz alýshy bereshegin jaýyp, zatyn qaitaryp ala alady. Al merzim ótken soń lombard kepildi satýǵa nemese óz menshigine rásimdeýge quqyly.
Agenttik ókilderi kredit berý týraly sońǵy sheshimdi bank nemese mikroqarjy uiymy zań talaptaryn jáne óziniń ishki kredittik saiasatyn eskere otyryp, jeke qabyldaitynyn atap ótti.
