Almaty qalasynyń bas sanitarlyq dárigeri Jandarbek Bekshin onlain brifing barysynda qala turǵyndarynyń karantin talaptaryn saqtamaitynyn aitty, dep habarlaidy QazAqparat.
Onyń aitýynsha, qalada eresekter men balalar kóshede jáne skverlerde beiqam júredi. Eshqandai saqtyq sharalaryn saqtamaidy. Bul koronavirýs infektsiiasynyń jańa tolqynyn týdyrýy múmkin.
Brifing barysynda Jandarbek Bekshin jýrnalisterdiń suraqtaryna jaýap bere kele qarqyndy epidemiologiialyq jaǵdaiǵa qaramastan, jańa shtamdardyń ainalymyna bailanysty lokdaýndy engizý josparlanbaǵanyn málim etti.
«Barlyǵy bizdiń tártipke, epidemiiaǵa qarsy sharalardy saqtaýǵa bailanysty. Árine, jańa shtamdardyń anyqtalǵany týraly aqparat alǵanmen, bizdiń meditsinalyq mekemeler syrqattanýshylyq kúrt ósken jaǵdaida ǵana daiyndyq júrgizedi», – dedi Jandarbek Bekshin.
«Almatyda koronavirýstyń úshinshi tolqyny kezinde kovidtik emhanalarda 6 060 tósek-oryn boldy. Qazir aýrýdyń azaiýyna bailanysty olardyń sany 1700-ge deiin tómendedi. Indetti juqtyrý artqan jaǵdaida emdeý mekemeleri qaita baqylaý júrgizedi», - dedi ol.
«Búginde lokdaýnǵa qatysty másele turǵan joq. «Delta» shtamyn juqtyrǵan bir jaǵdai anyqtaldy. Lokdaýnǵa jol bermeýimiz kerek. Ol úshin barlyq shekteý sharalaryn saqtaý qajet», – dedi Jandarbek Bekshin.
Almatynyń bas sanitarlyq dárigeri qala turǵyndaryn ekpe alýǵa, sondai-aq betperde rejimi men qoǵamdyq oryndarda áleýmettik qashyqtyqty saqtaýǵa shaqyrdy.
