Larisa Pak. Foto: facebook.com/larisa.yunboyevna.pak
Sybailas jemqorlyqqa qarsy ulttyq biýronyń burynǵy qyzmetkeri Olesia Kekseldiń ústinen Larisa Pakka qatysty rezonans isi boiynsha tergeýdiń ruqsat etilmegen ádisin (azaptaý) qoldanǵany týraly shaǵym tústi, - dep habarlaidy Tengrinews.kz tilshisi.
Olesia Kekselge qatysty aryzdy 2017 jyly para aldy dep aiyptalǵan Densaýlyq saqtaý ministrligi Farmatsiia komiteti burynǵy tóraǵasynyń mindetin atqarýshy Larisa Paktyń uly bergeni belgili boldy.
2019 jyly shildede Larisa Pak qaitys boldy. Ol 2020 jylǵy 7 jeltoqsanda iste qylmys belgileri bolmaýyna bailanysty aqtaldy. Larisa Paktyń advokaty Hamida Aitqalieva istiń mán-jaiyna qatysty pikir bildirdi.
"Sybailas jemqorlyqqa qarsy qyzmettiń jeke basy kórsetilmegen laýazymdy tulǵalaryna qatysty is boiynsha sotaldy tergeý bastaldy. Kúdiktige jáne basqa adamdarǵa qatysty shaǵymdy Larisa Paktyń uly túsirdi", - dedi Hamida Aitqalieva.
Advokat mundai ótinish pen aryz tergeý barysynda birneshe ret berilgenin atap ótti. Tengrinews.kz tilshisi Olesia Kekselge telefon arqyly habarlaspaq boldy, biraq ol qońyraýǵa da, habarlamaǵa da jaýap bermedi.
"Biz azaptaý, tergeýdiń ruqsat etilmegen ádisterin qoldaný, laýazymdy ókilettikti asyra paidalaný týraly málimdedik. Larisa Iýn-Boievnanyń kinásizdigine senimdi boldyq jáne oǵan taǵylǵan kiná boiynsha sotaldy tergeý zańsyz bastalǵany týraly habarladyq. Sonyń ishinde oǵan qatysty qylmystyq qýdalaý zańsyz boldy", - dedi advokat.
Hamida Aitqalieva Sybailas jemqorlyqqa qarsy is-qimyl agenttigi qyzmetkerlerine qatysty tergeý júrip jatqanyn, biraq nátijeni aitýǵa áli erte ekenin jetkizdi.
"Is materialy Larisa Iýn-Boievnaǵa taǵylǵan aiypty ońai joqqa shyǵardy. Sodan keiin qylmystyq qýdalaý organy oǵan qatty qysym kórsetti. Tek oǵan emes, búkil otbasyna. Soǵan qaramastan, ol aman qaldy. Ókinishke qarai, densaýlyǵy úshin kúresýge kúshi jetpedi", - deidi advokat Aitqalieva.
"Ol 2017 jylǵy 3 shildede ustaldy. Sybailas jemqorlyqqa qarsy is-qimyl agenttigi qyzmetkerleri ony 5 shildege deiin sýsyz, tamaqsyz, uiqysyz azaptaǵan. Tergeý júrip jatqandyqtan basqa esimderdi atamai-aq qoiaiyn. 2017 jylǵy 5 shildede sotqa jetkizildi. Sot 6 shildede túngi saǵat úshke deiin jalǵasty. Sot sheshimdi jariialaǵan boida Larisa Iýn-Boievna esinen tanyp qaldy.(...) Jedel járdemmen aýrýhanaǵa, sol jerden tergeý izoliatoryna jetkizildi. Ony qalai, qandai jaǵdaida jetkizgenin aitpaimyn. Bárimiz bul týraly kýáger retinde jaýap beremiz. Men de azaptaýǵa bailanysty qylmystyq is týraly sot aldynda jaýap beremin", - dedi advokat.
Larisa Pak tórt aidan asa tergeý izoliatorynda bolǵan. Hamida Aitqalieva Larisa Paktyń bir jylǵa jýyq úiqamaqta bolǵanyn, balalary men nemerelerin kóre almaǵanyn, sondai-aq tiisti meditsinalyq tekserýden óte almaǵanyn azaptaýǵa jatqyzyp, bul jaǵdailar ólimge ákep soqtyrǵanyn aitty.
"Meniń oiymsha, Antikordyń maqsaty múlde basqa adamdar boldy. Ol baiqaýsyzda nysanaǵa ainaldy. Olar Larisa Iýn-Boievna joǵary laýazymdy sheneýnikterdiń otbasylyq biznesinen habardar dep oilady. Biraq ol eshteńe bilmedi, jalǵan aitýdan bas tartty", - dedi advokat.
Hamida Aitqalieva tergeý bastalǵannan-aq para alǵany týraly eshqandai dálel joǵyn málimdedi.
"Qazanǵa deiin jańa aiyp taqpaǵansha, odan para alý deregi boiynsha jaýap almai ýaqyt sozdy. Bul týraly únemi aittyq, naqty is boiynsha jaýap alýdy talap ettik, biraq olar muny istemedi, sebebi olarda eshteńe bolmady. Soǵan qaramastan, Larisa Iýn-Boievna tergeýge qatysyp, olardyń barlyq suraǵyna jaýap beretinin aitty.
2018 jylǵy naýryzdyń aiaǵynda onyń isi Kasatkin men Ahmetovtyń isimen biriktirildi (S.K. Farmatsiianyń burynǵy basshylaryna qatysty is - esk.). Oǵan deiin BAQ biýdjet qarajatyn jymqyrdy degen aiyp taǵylmaǵanyn jazdy. Ondai bolǵan joq. Tek 2018 jylǵy naýryzda oǵan osy epizod boiynsha aiyp taǵyldy. Óitkeni onyń bastapqyda ne úshin ustalǵany dáleldenbedi, is toqtatyldy. Bul is aiyptaý aktisimen prokýratýraǵa jiberilgende, prokýratýra bizben kelisip, isti qaitardy (sybailas jemqorlyqqa qarsy qyzmetke - esk.). Óitkeni jańa epizodta oǵan qatysty eshqandai tergeý júrgizilgen joq", - dedi advokat Aitqalieva.
Hamida Aitqalieva Larisa Pakty kásipqoi, qarapaiym adam retinde eske alady.
"Ol jumysyn jaqsy kóretin edi, sondyqtan túnde jii jumys isteitinbiz, óitkeni onda JTÁ materialdary, zattai dálelder boldy. Osynyń bárin tyńdaý, oqý, sotqa daiyndalý kerek edi. Ol erik-jigeri myqty, biraq qarapaiym, sypaiy adam edi. Men onyń elge, Qazaqstanǵa kóp paida ákeletinine senetinmin. Oǵan kómektese almaǵanyma ókinemin.
Ol tergeý obektiv túrde júrgiziledi dep eseptedi. Basynda ony tyńdaitynyna, máseleniń sheshiletinine sendi... Keiin quqyq qorǵaý organy men sottan qatty kóńili qaldy", - dep eske alady Larisa Paktyń advokaty.
Larisa Pak 2018 jyly úi qamaýynan kepilge bultartpaý sharasy boiynsha aýystyrǵannan keiin meditsinalyq tekseristen ótýge múmkindik aldy. Sodan keiin oǵan qaterli isik diagnozy qoiyldy. 2019 jylǵy 6 shildede Larisa Pak qaitys boldy.
"(...) Sońǵy ret ota aldynda áńgimelestik, sodan keiin qaitys boldy. Sol kezde de ol "densaýlyǵym, ómirim, namysym úshin kúresemin, berilmeimin" degen edi," - dep eske alady Hamida Aitqalieva.
Is barysynda áieldiń advokaty barlyq instantsiiaǵa tergeý organynyń áreketin zańsyz dep taný týraly shaǵym joldaǵan. Larisa Pak qaitys bolǵannan keiin jumys jalǵasty. Shaǵymdardyń birin elordalyq tergeý soty qoldap, "qala prokýratýrasy, sybailas jemqorlyqqa qarsy qyzmettiń is-qimylyn, áreketsizdigin zańsyz" dep tanydy.
2020 jylǵy 7 jeltoqsanda Densaýlyq saqtaý ministrligi Farmatsiia komitetiniń burynǵy tóraǵasynyń mindetin atqarýshy Larisa Pakqa qatysty qylmystyq is jabyldy.
2022 jylǵy 7 shildede sybailas jemqorlyqqa qarsy qyzmet ókilderi Sybailas jemqorlyqqa qarsy is-qimyl ulttyq biýrosynyń burynǵy qyzmetkerleriniń zańsyz tergeý ádisterin qoldanýy boiynsha sotaldy tergeý bastalǵany týraly habarlama taratty. Sondai-aq, Sybailas jemqorlyqqa qarsy is-qimyl agenttigi taratylǵan sybailas jemqorlyqqa qarsy is-qimyl ulttyq biýrosynyń quqyqtyq murageri retinde Larisa Iýn-Boievna Paktyń týystaryna qaiǵyryp kóńil aitty jáne keltirilgen ziian úshin resmi keshirim surady.
Biyl shildede ótken alqa májilisinde sóz sóilegen sybailas jemqorlyqqa qarsy qyzmettiń basshysy Oljas Bektenov jaqynda aýmaqtyq departamentte laýazymdy tulǵalardy jaýapkershilikke tartý boiynsha upailardyń qalai berilgenin aityp berdi.
"Taiaqsha" júiesi barlyq múmkin tásilmen qajet nátijege qoljetkizýge itermeleidi. Ókinishtisi, el arasynda júrgen mysal az emes... Eń soraqysy, kórsetkishterdiń sońynan erip, keide joq jerde qylmys ta oidan shyǵarylǵan. Al eseptegi árbir tsifr adamnyń, onyń týystary men jaqyndarynyń taǵdyry ekeni umyt qalǵan", - dedi Bektenov.
