Foto: Pexels.com
Qazaqstan Respýblikasy Densaýlyq saqtaý ministrligi qyzylshaǵa qatysty epidemiologiialyq jaǵdaiǵa bailanysty profilaktikalyq jáne epidemiiaǵa qarsy sharalardy kúsheitti, dep habarlaidy Ult.kz.
Vedomstvonyń málimetinshe, jaǵdai turaqtalǵanǵa deiin 6–10 ailyq sábilerge qosymsha immýndaý engizildi. Sonymen qatar buryn vaktsina almaǵan 2–5 jáne 7–18 jas aralyǵyndaǵy balalardy, sondai-aq immýndaý deregi rastalmaǵan 30 jasqa deiingi meditsina qyzmetkerlerin tolyqtyryp vaktsinatsiialaý uiymdastyryldy.
Uiymdastyrylǵan ujymdar men áskeri bólimderde vaktsina almaǵan adamdardy ýaqytsha shettetý, sondai-aq josparly aýrýhanaǵa jatqyzý talaptary kúsheitildi.
Qabyldanǵan sharalar oń nátije bere bastaǵan. Ótken aptamen salystyrǵanda qyzylsha derekteri 417-den 311 jaǵdaiǵa deiin azaiǵan. Bul – 106 jaǵdaiǵa nemese 25,4 paiyzǵa tómen kórsetkish. Degenmen epidemiologiialyq ahýal tolyq turaqtaldy deýge áli erte.
Qyzylsha eń kóp tirkelgen óńirler qatarynda Astana qalasy (81 jaǵdai), Almaty qalasy (48), Almaty oblysy (57), Batys Qazaqstan oblysy (29), Atyraý oblysy (57) jáne Qostanai oblysy (57) bar. Aýrý juqtyrǵandardyń basym bóligi – 14 jasqa deiingi vaktsina almaǵan balalar.
2026 jyldyń basynan beri qosymsha immýndaýmen 6–11 ailyq 36,7 myń bala qamtylǵan. Josparly vaktsinatsiia aiasynda 1 jastaǵy 21,4 myń bala (6,7%) jáne 6 jastaǵy 17 myń bala (4,7%) ekpe alǵan. Sondai-aq 18 jasqa deiingi 8,1 myń adam tolyqtyryp immýndaýdan ótken.
Ministrlik jaǵdaiǵa turaqty monitoring júrgizip, tiisti sharalardy úilestirýdi jalǵastyryp otyr. Vedomstvo ókilderi ýaqtyly vaktsina alý jáne profilaktikaǵa jaýapkershilikpen qaraý – halyq densaýlyǵyn saqtaýdyń ári qyzylshanyń taralýynyń aldyn alýdyń negizgi sharty ekenin atap ótti.
