Foto: Pixabay
Qyzylorda qalasynda mektep oqýshysynyń seksýaldyq qanaýǵa ushyraýy qoǵamdy eleń etkizgen aýyr is retinde áli de nazardan túspei tur. Bul oqiǵa tek bir otbasynyń qasireti ǵana emes, jasóspirimder qaýipsizdigi máselesin qaita kótergen dabyl, dep habarlaidy Ult.kz.
Ishki ister ministriniń orynbasary Sanjar Ádilov istiń tergeý barysy jóninde málimdeme jasap, jábirlenýshini qanaýǵa qatysy bar tulǵalarǵa qatysty materialdar bólek óndiriske bólingenin aitty. Onyń sózinshe, zorlyq-zombylyq faktileri boiynsha negizgi aiyptalýshylar sottalǵan. Alaida jábirlenýshimen jynystyq qatynasqa túsken ózge tulǵalarǵa qatysty tergeý jalǵasyp jatyr.
«Birqatar baptar boiynsha tergeý aiaqtaldy. Kináliler sottaldy. Biraq basqa figýranttarǵa qatysty tergeý amaldary júrgizilýde», – dedi ol.
Ministr orynbasary sotaldy tergep-tekserý derekterin jariialaýǵa tyiym salynatynyn eske salyp, Qazaqstan Respýblikasynyń Qylmystyq-protsestik kodeksi 201-babyna silteme jasady. Sondai-aq jábirlenýshiniń jeke derekterin jariialaý máselesin onyń ózi sheshýge quqyly ekenin atap ótti.
Buǵan deiin 16 jastaǵy qyzdy synyptastary jezókshelikke májbúrledi degen kúdik qoǵamda úlken rezonans týǵyzǵan edi. Jábirlenýshiniń anasy qyzynyń minez-qulqyndaǵy ózgerister belgili bir synyptasymen jaqyn aralasa bastaǵannan keiin baiqalǵanyn aitqan. Keiin jasóspirim ózi de oqiǵanyń qalai órbigenin baiandap bergen.
Bul is tek qylmystyq jaýapkershilik týraly másele emes, bul mekteptegi orta, jasóspirimder arasyndaǵy yqpal, ata-ana men qoǵam baqylaýy, sondai-aq kámeletke tolmaǵandardy qorǵaý tetikteriniń álsiz tustary týraly kúrdeli suraqtardy alǵa tartady.
Qoǵam nazaryn aýdarǵan basty másele – jábirlenýshini paidalanǵan tulǵalardyń tolyq jaýapkershilikke tartylýy. Tergeý aiaqtalǵan soń, olardyń áreketine quqyqtyq baǵa berilmek.
