Qyzylordada oblystyq aýyl sharýashylyǵy basqarmasynyń birneshe qyzmetkerine asa iri kólemde memleket qarjysyn talan-tarajǵa salǵany úshin qylmystyq is qozǵaldy, dep habarlaidy "Ult aqparat".
Bul qylmystyq isti Qyzylorda oblysy boiynsha Ekonomikalyq tergep-tekserý departamenti qolǵa aldy. Departament mamandary asa iri kólemde investitsiialyq sýbsidiia qarajatyn talan-tarajǵa salyp, ári qarai jymqyrý deregi negizinde jumys júrgizýde. Bul boiynsha oblystyq aýyl sharýashylyǵy basqarmasy qyzmetkerlerine qatysty QR Qylmystyq kodeksiniń 189-babynyń 4-bóliginiń 2-tarmaǵymen qylmystyq is tergelýde.
«Oblystyq aýylsharýashylyq basqarmasynyń birneshe laýazymdy tulǵasy ózderiniń qyzmet babyn paidana otyryp keleńsiz jaǵdailarǵa jol bergen. Oblys aýmaǵynda 2019-2020 jyldarǵa arnalǵan birneshe joba boiynsha investitsiialyq sýbsidiia qarajatyn úlestirý barysynda birneshe kásipkerlik nysandarymen kelisimge kelgen. Sol arqyly asa iri kólemde memleket qarjysyn talan-tarajǵa salyp, jymqyrýdy júzege asyrǵan. Atalǵan qyzmetkerler birqatar sharýa qojalyqtarynda eshqandai jumys atqarylmasa da, jabdyqtar múldem qoiylmasa da, olardyń tolyq oryndalǵany týraly jalǵan hattama toltyryp, oǵan qol qoiǵan. Júrgizilgen sot-qurylys saraptamalary negizinde birneshe sharýa qojalyqtary boiynsha memleketke keltirilgen zalal somasy 26 mln 792 myń teńgeni qurap otyr», - dep málim etti Qyzylorda oblysy boiynsha ekonomikalyq tergep-tekserý departamentiniń baspasóz qyzmeti.
Vedomsto málimetinshe, QR Qylmystyq kodeksiniń 189 baby 4-bóliginiń 2-tarmaǵy boiynsha mundai qylmysqa jol bergen azamattar belgili bir laýazymdardy atqarý quqyǵynan ómir boiyna shektelip, olarǵa jeti jyldan on eki jylǵa deiingi merzimge bas bostandyǵynan aiyrý jazasy kózdelgen.
