Eńbek jáne halyqty áleýmettik qorǵaý ministrligi zeinetaqy jinaǵyn merziminen buryn paidalanýdyń shekti mólsherine qatysty málimdemesin joqqa shyǵardy, dep habarlaidy Sputnik Qazaqstan.
Buǵan deiingi resmi habarlamada ministrlik zeinetaqy jinaǵyn paidalanýǵa qatysty eń tómengi jektkilikti shekti esepteý ádistemesin ázirlegenin, biraq barlyq esep-qisapty Biryńǵai jinaqtaýshy zeinetaqy qory jasaitynyn málimdegen.
Zań boiynsha biryńǵai operator halyq arasynda túsindirý jumystaryn da júrgizýge mindetti. Al "eńbek jáne halyqty áleýmettik qorǵaý ministrliginde ondai quziret joq, sondai-aq, BJZQ eseptegen jetkilikti shektiń durystyǵyn rastai almaidy" degen aqparat taratyldy. Osy habarlama ministrliktiń resmi saitynda jariialandy. Biraq birshama ýaqyttan keiin ony alyp tastady.
Ministrlik búgingi málimdemesinde osy máselege qatysty túsikteme berdi.
"Eńbek jáne halyqty áleýmettik qorǵaý ministrligi 2021 jyldyń 7 jeltoqsanynda taratylǵan baspasóz relizinde zeinetaqy jinaǵynyń eń tómengi jetkilikti shegin belgileý máselesinde ministrlik quzyretine qatysty burys tujyrymǵa jol berilgenin habarlaidy. Osy baspasóz relizin ministrliktiń resmi saitynda, akkaýnttarynda jáne áleýmettik mediada jariialaǵan qyzmetkerge tiisti tártiptik jazalaý sharalary qoldanyldy", - delingen resmi habarlamada.
Osy oraida ministrlik mamandary zeinetaqy jinaǵynyń eń tómen jetkiliktilik shegin aiqyndaý ádistemesin ázirlegenin taǵy bir márte rastap, aldaǵy ýaqytta oǵan ózgeris engizilmeitinin jetkizdi.
"Óitkeni onyń qazirgi nusqasy qazaqstandyqtarǵa bolashaq zeinetaqy tólemderin qolaily deńgeide qamtamasyz etýdiń qajetti ólshemderine tolyq sáikes keledi", - deidi mamandar.
Ádistemege sáikes, jetkiliktilik shegin esepteýdiń negizgi parametrleriniń biri - jyl basyndaǵy eń tómengi jalaqy mólsheri. Al 2022 jyldan bastap eń tómengi jalaqy 42 500 teńgeden 60 000-ǵa deiin kóteriledi. Osyǵan bailanysty jetkiliktilik shegi de avtomatty túrde qaita esepteledi.
Ádisteme qai kezde bekitildi?
Eńbek jáne halyqty áleýmettik qorǵaý ministrligi zeinetaqy jinaǵynyń eń tómengi jetkilikti shegin aiqyndaý ádistemesin 2020 jylda ázirlegen. Al 2021 jyldyń 6 qańtarynda úkimet ony arnaiy qaýlymen bekitti.
Ádistemege sáikes, jetkiliktilik shegi esepteý kezinde tiisti kórsetkishter esepke alynady. Olar:
BJZQ tabystylyǵynyń jyldyq paiyzdyq mólsherlemesi;
BJZQ-jan tólenetin zeinetaqy tólemderin indeksteý mólsherlemesi;
eń tómengi zeinetaqy mólsherin indeksteý mólsherlemesi;
jyl saiynǵy indeksteýmen jalaqynyń eń tómengi mólsheri;
eń tómengi mólsherdegi bazalyq zeinetaqyny esepteý úshin indeksteýdi eskere otyryp, eń tómengi kúnkóris deńgeiiniń mólsheri;
mindetti zeinetaqy jarnalarynyń boljamdy jiiligi;
zeinetaqy tólemderin júzege asyrýdyń bastapqy jáne shekti jasy.
