Foto: pexels
Atyraýda 21 jastaǵy jigit 19 jastaǵy qyzdy azaptady degen kúdikpen ustaldy. Oqiǵaǵa bailanysty qylmystyq is qozǵaldy, dep habarlaidy Ult.kz «Moi gorod» basylymyna silteme jasap.
Basylymnyń málimetinshe, áleýmettik jelilerde taraǵan aqparatta kúdiktiniń qyzdy birneshe saǵat boiy uryp-soǵyp, azaptaǵany aitylǵan. Sondai-aq ol bolǵan jaǵdaidy videoǵa túsirip, keibir kadrlaryn Instagram Stories pen Telegram jelisinde jariialaǵan.
Atyraý oblystyq politsiia departamenti tergeý Qazaqstan Respýblikasy Qylmystyq kodeksiniń 110-baby – «Azaptaý» boiynsha júrgizilip jatqanyn málimdedi. Kúdiktiniń jeke basy anyqtalyp, is aiasynda sot-meditsinalyq saraptamalar taǵaiyndalǵan.
Sonymen qatar Atyraý qalasynyń mamandandyrylǵan ákimshilik quqyq buzýshylyqtar jónindegi soty 9 naýryzdaǵy qaýlysymen er adamdy usaq buzaqylyq jasaǵany jáne mas kúide qoǵamdyq orynda júrgeni úshin kináli dep tanydy. Ol 30 táýlikke ákimshilik qamaýǵa alynǵan.
Oblystyq densaýlyq saqtaý basqarmasynyń málimetinshe, 8 naýryz kúni 19 jastaǵy qyz Atyraý oblystyq aýrýhanasynyń travmatologiia bólimine jetkizilgen. Dárigerler tekserý barysynda onyń qoly, aiaǵy jáne betinde jeńil jaraqattar bar ekenin anyqtaǵan. Qajetti meditsinalyq kómek kórsetilgennen keiin ol ambýlatoriialyq em alýǵa jiberildi. Qazirgi jaǵdaiy qanaǵattanarlyq dep baǵalanyp otyr.
Politsiia Qylmystyq is júrgizý kodeksiniń 201-babyna sáikes tergeý múddesine bailanysty ózge aqparat jariialanbaitynyn málimdedi.
