Foto: Depositphotos.com
Qaraǵandyda kámeletke tolmaǵan qyzdy top bolyp soqqyǵa jyqqan jasóspirimderdiń biriniń anasy ákimshilik jaýapkershilikke tartyldy. Is kámeletke tolmaǵandardyń isteri jónindegi mamandandyrylǵan aýdanaralyq sotta qaraldy, dep habarlaidy Ult.kz.
Sotta áielge qatysty Ákimshilik quqyqbuzýshylyq týraly kodekstiń 127-baby 2-bóligi («Kámeletke tolmaǵan balany tárbieleý jónindegi mindetterdi tiisinshe oryndamaý») boiynsha is qaralǵan.
Is materialdaryna sáikes, 2010 jyly týǵan jasóspirim qyzdyń anasy bala tárbiesine tiisti deńgeide kóńil bólmegen. Baqylaýdyń jetkiliksiz bolýy saldarynan kámeletke tolmaǵan qyz quqyqqa qaishy áreketke barǵan.
Jasóspirim basqa balalarmen birge taǵy bir kámeletke tolmaǵan qyzdy soqqyǵa jyqqan. Bul áreket Qylmystyq kodekstiń 293-baby 3-bóligi («Buzaqylyq») boiynsha saralanǵan.
Sot málimetinshe, jasóspirimniń anasy balalardy tárbieleý, oqytý jáne asyraý jónindegi mindetterin tiisinshe oryndamaityn ata-analar sanatyna jatady jáne politsiianyń profilaktikalyq esebinde tur. Onyń qyzy da mektepishilik jáne politsiia bólimindegi profilaktikalyq esepke alynǵan.
Sot barysynda áiel óz kinásin moiyndady. Ol qyzy ájesiniń úiine ketip qalǵandyqtan, onyń júrgen jerin baqylaýǵa múmkindigi bolmaǵanyn, keiin qaida bolǵanyn bilmegenin aitty.
Prokýror sottan jasóspirimniń anasyn ákimshilik jaýapkershilikke tartyp, aiyppul salýdy surady.
Sot qaýlysymen áiel Ákimshilik quqyqbuzýshylyq týraly kodekstiń 127-baby 2-bóligi boiynsha kináli dep tanylyp, oǵan 45 413 teńge kóleminde aiyppul salyndy. Qaýly ázirge zańdy kúshine engen joq.
Eske salaiyq, buǵan deiin áleýmettik jelide Qaraǵandyda qyzdyń bir top jasóspirim tarapynan soqqyǵa jyǵylǵany týraly onyń anasynyń úndeýi taraǵan edi. Politsiia alty kámeletke tolmaǵan jasóspirim anyqtalyp, bólimshege jetkizilgenin habarlady. Alǵashqy tergeý nátijesinde janjaldyń bastamashylary bir ul men bir qyz ýaqytsha ustaý izoliatoryna qamaldy. Atalǵan fakti boiynsha buzaqylyq baby boiynsha qylmystyq is qozǵaldy.
