Jeksenbi kúni Qytaida toqtaýy bolmai otyrǵan sý tasqynyna bailanysty tótenshe jaǵdailarǵa áreket etý deńgeii úshinshiden ekinshi deńgeige kóterildi. Bul týraly QHR Sý resýrstary ministrligi habarlaidy.
Málim etilgendei, bul sharanyń engizilý sebebi – maýsym aiy bastalǵaly Qytaidyń Ortalyq, Shyǵys jáne Ońtústigindegi kóptegen aýdandarda nóser jaýyn tolastamai otyr. Zardap shekken óńirlerde ózender deńgeii qaýipti mejeden asyp túsken. Al 19 sý arteriiasynda tarihi maksimýmdar tirkeldi.
«Al Tsziansi (Shyǵys Qytai) provintsiiasynyń biligi tótenshe jaǵdaiǵa áreket etý deńgeiin ekinshiden birinshige (eń joǵary) kóterdi. Munda 5 millionǵa jýyq adam sý tasqyny aýmaǵynda qalyp otyr. Tabiǵattyń tosyn minezinen 500 myń gektarǵa jýyq egistik alqabyna zaqym keldi. Jergilikti bilikke bógetterge, sý qoimalary men gidroelektrstantsiialaryna baqylaýdy kúsheitý júkteldi», - delingen aqparatta.
Eske salaiyq, Qytaida tótenshe oqiǵalarǵa áreket etýdiń tórt deńgeili júiesi qarastyrylǵan.
