Qytaidyń Tiantszin qalasynda COVID-19-dyń omikron shtamyn juqtyrýdyń alǵashqy jaǵdaiy tirkeldi. Bul týraly dúisenbi kúni jariialanǵan Aýrýlardy baqylaý jáne aldyn alý jónindegi mýnitsipaldyq ortalyqtyń habarlamasynda jazylǵan, dep habarlaidy QazAqparat «Sinhýa» agenttigine silteme jasap.
Omikron shtamyn juqtyrǵan azamat shetelden kelgen. Aýrý simptomsyz jalǵasýda, qazirgi kezde ol oqshaýlanǵan jáne arnaiy bólingen aýrýhanada em qabyldap jatyr. «Bul – qurlyqtyq Qytaidaǵy omikron shtamyn jutyrýdyń birinshi jaǵdaiy», - delingen Tiantszin qalasynyń epidemologiialyq shtabynyń habarlamasynda.
Qytai megapolisiniń biligi turǵyndardy COVID-19-dyń aldyn alý jáne baqylaý sharalaryn ustanýǵa, maska taǵýǵa, qoldy jii jýýǵa jáne áleýmettik qashyqtyqty saqtaýǵa shaqyrady.
Tiantszin – Qytaidyń ortalyq baǵynysyndaǵy qala, 13 millionnan astam turǵyny bar. Ol el astanasy Beijińnen 100 shaqyrym jerde ornalasqan.
