Sońǵy táýlikte Qytaida koronavirýs juqtyrǵan 40 jańa jaǵdai anyqtaldy, olardyń arasynda kóz jumǵandar joq, dep habarlaidy "Ult aqparat".
QHR Gigiena jáne densaýlyq saqtaý isteri jónindegi memlekettik komitetiniń habarlaýynsha, 11 maýsymnan beri sońǵy bes kún ishinde koronavirýs juqtyrǵan jańa jaǵdailar sany Qytai astanasynda 100 adamnan asty. Olardyń basym kópshiligi Beijińniń ońtústik-batys bóligindegi «Sinfandi» kóterme azyq-túlik bazarynan anyqtaldy.
Beijińdegi «Fentai» aýdanynda «áskeri jaǵdai rejimi» engizildi. Onda «Sinfandi» bazaryna jaqyn ornalasqan 20-dan astam turǵyn úi kesheni karantinge jabyldy. Koronavirýstyń órshýine bailanysty Beijińniń basqa aýdandarynda epidemiologiialyq qaýip deńgeii kóterildi.
Beijiń biligi biylǵy jyldyń 30 mamyrynan beri osy bazarǵa kelgen 200 myńǵa jýyq turǵynnyń páterlerin aralap tekserýge, 100 myńǵa jýyq áleýmettik qyzmetkerdi jumysqa tartty.
90 myńǵa jýyq turǵyn COVID-19-ǵa test tapsyrdy.
Jergilikti BAQ-tyń habarlaýynsha, Beijiń qalasy Infektsiialyq aýrýlardy baqylaý jáne aldyn alý ortalyǵynyń sarapshylary elorda halqyn jappai testileý qajet degen qorytyndyǵa áli kelgen joq.
Eske salsaq, Qytaida bir táýlikte 77 myńǵa jýyq adam koronavirýske test tapsyrdy. Keshe virýstyń taralýyna bailanysty Beijińniń úsh aýdany men mańyndaǵy qalalarda áskeri jaǵdai engizilgeni týraly habarlaǵan edik.
