Foto: Qazaqstandaǵy Qytai elshiliginiń baspasóz qyzmetinen
Sońǵy jyldary Qazaqstan men Qytai ózara vizasyz rejim engizip, «Týrizm jylyn» tabysty ótkizdi. Bul eki el arasyndaǵy adamdar aǵynynyń aitarlyqtai artýyna yqpal etip, halyqtar arasyndaǵy ózara túsinistiktiń tereńdeýine jol ashty. Biyl sondai-aq «Qytai men Qazaqstan arasyndaǵy mádeni almasý jyly» ótedi, bul eki el arasyndaǵy mádeni yntymaqtastyqtyń jańa deńgeige kóterilýin bildiredi. Osy oraida Ult.kz tilshisi Qytai Halyq Respýblikasynyń Qazaqstan Respýblikasyndaǵy Elshisi Han Chýnlinnen qazirgi tańda Qazaqstan men Qytai arasyndaǵy mádeni bailanystar salasyndaǵy yntymaqtastyqty qalai baǵalaitynyn jáne bul yntymaqtastyq eki el arasyndaǵy qatynastardy damytýda qandai ról atqaratynyn surap bildi.
Foto: Qazaqstandaǵy Qytai elshiliginiń baspasóz qyzmetinen
«Qytai men Qazaqstandy ortaq taýlar men ózender bailanystyrady, al olardyń mádeni almasýlarynyń tamyry tereń tarihqa ketedi. Tóraǵa Si atap ótkendei, Qytai men Qazaqstan – tatý kórshiler, jaqsy dostar jáne senimdi seriktester. Eki eldiń halyqtaryn myńjyldyqtarǵa sozylǵan dostyq bailanystar biriktiredi, olar Uly Jibek joly boiyndaǵy mádeni ózara yqpaldastyq tarihynda jarqyn better jazyp keledi.
Mádeni almasýlar men yntymaqtastyq ejelden Qytai-Qazaqstan qatynastarynyń mańyzdy quramdas bóligi ári damýdyń sarqylmas qýat kózi bolyp tabylady. Búginde bul bailanystar kún saiyn nyǵaiyp, ekijaqty yntymaqtastyqtyń mańyzdy ári qarqyndy damyp kele jatqan baǵytyna ainalýda. Sońǵy jyldary eki el basshylarynyń jeke nazar aýdaryp, qoldaý kórsetýiniń arqasynda Qytai men Qazaqstan ózara jaqyndasyp, tiimdi institýtsionaldyq tetikteri, yńǵaily ári nátijeli bailanys arnalary jáne túrli sýbektilerdiń belsendi qatysýymen jańa yntymaqtastyq arhitektýrasyn qalyptastyrdy. Mádeni-gýmanitarlyq bailanystar qarqyndy damý kezeńine ótti», – dedi Han Chýnlin myrza óz sózinde.
Elshiniń sózinshe eki tarap bilim berý, ǵylym men tehnika, mádeniet, sport, týrizm, buqaralyq aqparat quraldary jáne basqa da salalarda birqatar yntymaqtastyq qujattaryna qol qoiyp, osy baǵyttaǵy ózara is-qimyldy turaqty túrde keńeitip, tereńdetip keledi.
Búginde eki el arasynda baýyrlas qatynas ornatqan 32 jup provintsiia, oblys jáne qala bar. 5 Konfýtsii institýty tabysty jumys isteýde, sondai-aq úshinshi «Lý Ban sheberhanasy» resmi túrde qyzmetin bastady. Qytaidyń tórt joǵary oqý ornynda Qazaqstandy zertteý ortalyqtary qurylǵan, al Qazaqstanda Qytaidyń úsh ýniversitetiniń filialdary ashylǵan. Beijińde Qazaqstannyń mádeni ortalyǵy tabysty jumys istep tur, al Qazaqstanda Qytai mádeni ortalyǵynyń qurylysy qarqyndy júrgizilýde.
«Ózderińiz atap ótkendei, vizasyz rejimniń engizilýi jáne týrizm jyldarynyń ótkizilýi eki el azamattarynyń ózara saparlaryn aitarlyqtai jeńildetip, týrizm salasyndaǵy yntymaqtastyqty mádeni-gýmanitarlyq bailanystardyń jańa vizit kartasyna ainaldyrdy. Qytaidyń Hainan provintsiiasy men Qazaqstannyń Almaty qalasy eki el týristeri arasynda erekshe tanymal baǵyttarǵa ainaldy. Tikelei áýe reisteriniń sany artyp, eki elge saparlar jasaý jańa úrdiske ainalýda. Osy qarqyndy mádeni almasýlar aiasynda halyqtarymyzdyń júrekteri bir-birine burynǵydan da jaqyndai túsýde», – dedi ol.
Eki el basshylarynyń kelisimi boiynsha 2026 jyl Qytai men Qazaqstan arasyndaǵy mádeni almasý jyly bolyp jariialandy. Osy aiada túrli is-sharalar, sonyń ishinde óner kórsetilimderi men kórmeler ótkizý josparlanýda. Eki memleket mádeni bailanystardy basty dáneker retinde paidalana otyryp, ózara mádeni úirenýdi odan ári tereńdetip, halyqtar arasyndaǵy ózara túsinistikti nyǵaitatyn jańa dostyq kópirin qalyptastyra bermek.
«Memleketaralyq qatynastardyń negizinde halyqtar arasyndaǵy dostyq jatyr. Qytai men Qazaqstan halyqtarynyń dostyǵy – eki el arasyndaǵy máńgilik jan-jaqty seriktestiktiń damýyna qýat beretin mańyzdy qainar kóz. Jańa tarihi kezeńde Qytai tarapy mádeni-gýmanitarlyq almasýlar men yntymaqtastyqty odan ári nyǵaitýǵa, memleketaralyq qatynastardyń mazmunyn baiytýǵa jáne ǵasyrlar boiǵy dostyqtyń qoǵamdyq negizin kúsheitýge daiyn. Bul óz kezeginde Qytai men Qazaqstan qatynastarynyń jańa «altyn otyz jyldyǵyn» qalyptastyrýǵa tyń serpin beredi»», – dedi elshi tilshimizge.
Aita keteiik, ústimizdegi jyldyń 27 naýryzynda Qytai Halyq Respýblikasynyń Qazaqstan Respýblikasyndaǵy Elshisi Han Chýnlin «eki sessiianyń» rýhyna arnalǵan baspasóz konferentsiiasyn ótkizdi.
Elshi Han Chýnlin 2026 jylǵy «eki sessiianyń» negizgi baǵyttaryn tanystyryp, Qytaidyń 14-besjyldyq kezeńdegi jetistikteri men 15-besjyldyqtyń strategiialyq maqsattaryn atap ótti. Ol Qytai ekonomikasy jahandyq damýǵa serpin berip, kóppoliarly álem men ashyq ekonomikalyq jahandanýdy ilgeriletýdi jalǵastyratynyn aitty. Sonymen qatar, Qytai Qazaqstanmen birlesip strategiialyq yntymaqtastyqty tereńdetip, «Bir beldeý – bir jol» aiasynda qatynastardyń jańa «altyn kezeńin» qalyptastyrýǵa daiyn ekenin jetkizdi.
