Osy jyldyń qyrkúieginde balalar onlain oqi ma, álde mektepke bara ma? Bul suraqqa Bilim jáne ǵylym ministri Ashat Aimaǵambetov jaýap berdi, dep habarlaidy QazAqparat.
«Birinshiden jalpy daiyndyq joǵary deńgeide júrgizilip jatyr. Aiaqtalǵan oqý jylynyń tórtinshi toqsanynda da daiyndyq jumystary toqtap qalǵan emes. Bul týraly buryn da aitqanbyz. Ekinshiden, bul turǵyda Bilim jáne ǵylym ministrliginiń jalpy jospary bar. Kúrdeli epidemiologiialyq jaǵdaidy eskere otyryp, biz áý bastan úsh negizgi nusqaǵa daiyndaldyq. Boljamymyz durys bolyp shyqty», - dedi Ashat Aimaǵambetov Bilim jáne ǵylym ministrliginiń onlain formattaǵy tilshilermen kezdesýinde.
Ministrdiń aitýynsha osy úsh baǵyt boiynsha daiyndyq jumystary qyzý júrgizilýde.
«Osy úsh nusqa Densaýlyq saqtaý ministrligimen, basqa da memlekettik organdarmen talqylaný ústinde. Onyń qyr-syryn zertteý boiynsha jumys toptary bar. Iske ǵalymdar men pedagogtardy, mektep direktorlary men sarapshylardy tarttyq. Sol sebepti qazirgi ýaqytta barly óńirde úlken talqylaý jumystary júrgizilýde. Osyǵan deiin áleýmettik jelide tarap ketken slaid-material Bilim jáne ǵylym ministrligine tiesili emes. Ony mektep deńgeiinde talqylaǵandardyń biri taratýy múmkin», - dedi ol.
Ashat Aimaǵambetov sonymen birge muǵalimderge arnalǵan kýrstar daiyndalǵanyn jetkizdi.
«Eń mańyzdy suraqtardyń biri – pedagogterdiń qazirgi jańa jaǵdaiǵa daiyndyǵy. Qandai nusqa qabyldansa da pedagogterge jańa daǵdy kerek. Ony tórtinshi toqsanda aiqyn baiqadyq. Sondyqtan bes modýlden turatyn osy kýrstar – IT-daǵdy, tsifrlyq pedagogika máselelerin qamtidy. Qandai nusqa qabyldansa da – osy kýrstardy júrgizemiz. Sondai-aq kompiýter men serverler, internet máselesi. Qashyqtan oqysaq ta, qalypty oqysaq ta – mektepterge kompiýter kerek. Ákimdikter osy máselege jiti nazar aýdaryp otyr. Eger mektepte bir kompiýterge 20-25 baladan kelse, onda olardyń IT-daǵdysyn damytamyz degen sóz beker», - dedi ol.
Ministr óz sózinde erekshe qajettiligi bar balalarǵa beriletin bilim sapasy máselesi de umytylmaitynyn jetkizdi.
