Qyrǵyzstan shilde aiynda Covid-19-ǵa shaldyqqandar sany 4,5 esege ósken, dep habarlaidy BBC.
Qyrǵyzstanda koronavirýs juqtyrǵandar sanynyń kúrt ósýine bailanysty aýrýhanalarda oryn jetpei jatyr, dári-dármekterdi naýqastardyń týystary satyp alýda. Eldiń densaýlyq saqtaý júiesi ózderinejúktelgen mindetti oryndai almai jatyr, al depýtattar demalysqa ketti.
Qyrǵyzstan kórshileri Qazaqstan men Ózbekstan sekildi naýryz aiynyń sońynda áýe shekarasyn jaýyp, elde qatań shekteý engizdi.
Eldiń eń iri úsh qalasynda – Bishkek, Osh, Djalal-Abadta jáne birneshe aýdanda tótenshe jaǵdai jáne komendanttyq saǵat jariialandy. Jergilikti turǵyndardyń úilerinen shyǵýyna tyiym salynyp, kásiporyndardyń qyzmetkerleri qashyqtan jumys istedi. Qoǵamdyq kólikter men taksi toqtatylyp, eldegi bilim oshaqtary eki aiǵa jabyldy. Shekteýdi buzǵandarǵa aiyppul salyndy.
Mundai qatań sharalar Qyrǵyzstanǵa qymbatqa tústi: salyq ondaǵan esege qysqardy. Biýdjet defitsiti 37 mlrd somǵa (500 mln dollar) jetti. Ekonomika ministrligi jyl qorytyndysy boiynsha JIÓ – minýs 5,3%-ǵa tómendeidi dep boljap otyr. Bul el mundai daǵdarysty 1990 jyldary bastan ótkergen edi.
Mamyr aiynda karantin bosańsyǵan kezde densaýlyq saqtaý ministrligi 6,5 mln turǵyn arasynda tek 1002 adam aýrý juqtyryp, 12 adamnyń qaitys bolǵanyn málim etti. Aýrýǵa shaldyqqandardyń basym bóligi basqa elderden kelgen qyrǵyz azamattary.
Qyrǵyzstan shekteý sharalaryn bir aidyń ishinde birtindep ala bastady: ekonomikanyń barlyq sektory, sonyń ishinde qoǵamdyq kólikter men bazarlar birinen keiin biri jumysqa kiristi. Sol kezde Covid-19 juqtyrǵandar sany 2 myń adamǵa jetti.
Maýsym aiynda barlyq shekteý sharalary alynyp tastalǵannan keiin aýrýǵa shaldyqqandar sany birden ósti: karantin kezinde kúnine 25-80 adam koronavirýs juqtyrsa, maýsym aiynyń ortasynda bul kórsetkish 300-700 adamǵa jetti.
Qazir qalada adamdar dúrligip jatyr.
