Koronavirýs infektsiiasyna bailanysty elde epidemiologiialyq ahýaldyń nasharlap ketý yqtimaldylyǵyna daiyn bolý qajet. Bul týraly Qyrǵyzstan premer-ministri Kýbatbek Boronov brifing barysynda málim etti, dep habarlaidy "Ult aqparat" «Kabar» agenttigine silteme jasap.
«COVID-19 pandemiiasyna bailanysty aǵymdaǵy áleýmettik-ekonomikalyq jáne epidemiologiialyq ahýal kúrdelene túsýde. Azamattardyń koronavirýs infektsiiasyn juqtyrý oqiǵalary kúndelikti tirkelip otyr. Ásirese Bishkek pen Osh qalalarynda, Shý oblysynda jaǵdai kúrdeli. Bul rette, óńirlerde jaǵdaidy baqylaý boiynsha jumystar qajetti deńgeide júrgizilmei otyr. Qyrǵyz Respýblikasynyń qaýipsizdik keńesiniń otyrysynda atap ótilgendei, oblystardyń basshylary ózderine senip tapsyrylǵan aýmaqtardaǵy epidemiologiialyq ahýalǵa tikelei jaýapty», - dedi Kýbatbek Boronov.
Qyrǵyz Respýblikasy Qaýipsizdik keńesiniń sheshimimen memleket aýmaǵynda tiisti epidemiologiialyq qadaǵalaýdy qamtamasyz etý tapsyryldy.
«Sheshimde kórsetilgen barlyq tapsyrma sapaly, tolyq kólemde jáne ýaqtyly oryndalýy tiis. Árbir memlekettik organ jáne árbir oblys kúz-qys kezeńine keshendi daiyndyq sharalaryn iske asyrýy qajet. Bul, naýqastar sanynyń artýyna meditsina mekemeleriniń daiyn bolýyna, sondai-aq ekonomikalyq qyzmettiń túrli baǵyttarynyń jumysyna bailanysty. Sonymen qatar COVID-19-ben syrqattanýdyń artýyna bailanysty birqatar sharalar qabyldanady», - dedi ol.
Aqparatqa sáikes, Bishkek qalasynda senbi kúni tústen keiin jáne jeksenbide kúni boiy qoǵamdyq kólik qozǵalysy toqtaidy. Sondai-aq qoǵamdyq kóliktiń óńirler arasynda qatynaýyna tyiym salý qarastyrylýda. Bul rette, taksi, jeke kólik jáne júk tasityn avtokólikter kedergisiz qozǵala bermek.
Qyrǵyzstan Úkimetiniń basshysy árbir azamat óziniń jáne jaqynynyń densaýlyǵy úshin jaýapty ekenin qadap aitty.
