Kórsetkishterdi oryndaýǵa umtylǵan tártip saqshylary joq jerde qylmysty oilap tapqan. Bul týraly sybailas jemqorlyqqa qarsy qyzmettiń basshysy Oljas Bektenov málimdedi, - dep habarlaidy Tengrinews.kz.
Bektenov aýmaqtyq departamentterde laýazymdy tulǵalardy jaýapkershilikke tartqany úshin qalai upai berilgenin aitty.
"Sheneýniktiń dárejesi neǵurlym joǵary bolsa, soǵurlym joǵary upai berilgen. Bul oiǵa siiar emes! Biraq solai boldy. Zalda otyrǵandardyń kóbi buǵan kýá. Biz baǵalaý júiemizdi taldap, kórsetkishter massasynda eń bastysy – azamattardyń jumysymyzǵa qanaǵattanýy jetispeidi degen qorytyndyǵa keldik", - dedi Oljas Bektenov Sybailas jemqorlyqqa qarsy is-qimyl agenttiginiń alqa májilisinde.
Onyń aitýynsha, jedel jaǵdai men aryz-shaǵymdardy baqylaý azamattardyń Antikor jumysyna kóńili tolmaitynyn kórsetedi.
"Áleýmettik jelide ne jazyp jatqanyn kórý qarapaiym nárse. Adamdarǵa jaqsy turǵyn úi men jol qajet. Qoljetimdi jer men aýyz sý. Sapaly bilim men meditsina. Ádil sot pen qaýipsiz ómir súrý ortasy.
Mine, halyqtyń ótinishteri. Al biz osylardy estimei, "ádemi" statistika úshin jumys istep jatyrmyz. Sybailas jemqorlyqty joiý jumysynyń tiimdiligin eshbir tsifr tolyq kórsete almaitynyna senimdimin", - dep qosty Bektenov.
Ol ár basshy san úshin, eń aldymen, azamattardyń ózekti máselelerin sheshýdi emes, nysanaly indikatorlarǵa resmi qoljetkizýdi oilaitynyn atap ótti.
"Biz naqty nátijeden góri protseske kóbirek qumarmyz. (...) Jumys áli de kóp/az printsipi boiynsha baǵalanady. Qalaǵanyńdy iste, biraq byltyrǵydan kóp qylmysty anyqta. Munymen nege qol jetkizemiz? Al oblysta sybailas jemqorlyq jaǵdaiy jaqsaryp, shynymen qylmys azaisa she? Sonda kórsetkishterdi qaidan alý kerek? Bul barlyq múmkin tásildermen qajetti nátijege qoljetkizýge itermeleidi. Ókinishtisi, munyń mysaldary kóp", - deidi Antikora basshysy.
Bektenov kórsetkishti qýyp keide qylmys joq jerden oidan shyǵarylatynyn aitty. Árbir istiń artynda – adamnyń taǵdyry bar. Osyny umytpaýymyz kerek, dedi ol.
