Foto: kyrtag.kg
Almatyda «Qaztemirtrans» AQ filialynyń direktory iri kólemde para aldy degen kúdikke ilindi. Kompaniia basshylyqqa qatysty taraǵan aqparatqa bailanysty resmi túsinikteme berdi, dep habarlaidy Ult.kz.
Kompaniia málimetinshe, qazirgi ýaqytta quqyq qorǵaý organdary tiisti tergeý is-sharalaryn júrgizip jatyr. «Qaztemirtrans» ýákiletti organdarǵa tolyq qoldaý kórsetip, tergeý aiasynda barlyq qajetti qujattar men aqparatty usynýda.
Sonymen qatar, kompaniia filial nysandaryn kúzetý boiynsha memlekettik satyp alý konkýrsynda jeńiske jetýge kómekteskeni úshin zańsyz syiaqy aldy degen aqparatqa kúmán keltiretinin málimdedi.
«Qaztemirtrans» dereginshe, kúzet qyzmetterin kórsetýge qatysty kompaniia men kúzet uiymdary arasyndaǵy barlyq kelisimshart rásimderi tolyq aiaqtalǵan.
Anyqtamaǵa sáikes, kúzet qyzmetterine arnalǵan «Qaztemirtrans» AQ-nyń jalpy biýdjeti shamamen 200 mln teńgeni quraidy. Al Almaty filialy boiynsha biyl óndiristik bazalardy kúzetýge 9 mln teńgeden astam qarjy bólingen. Kompaniia bul soma aqparat keńistiginde aitylyp júrgen yqtimal para mólsherinen birneshe ese az ekenin atap ótti.
Sondai-aq kompaniia zańdylyq, ashyqtyq jáne sybailas jemqorlyqtyń kez kelgen kórinisine múlde tózbeýshilik qaǵidatyn ustanatynyn jetkizdi. Eger zań buzý faktileri rastalsa, tiisti zań aiasynda barlyq shara qoldanylatyny aityldy.
Qazir «Qaztemirtrans» shtattyq rejimde jumysyn jalǵastyryp, seriktester men klientter aldyndaǵy mindettemelerin oryndap jatyr. Tergeý nátijeleri týraly qosymsha aqparat keiin jariialanatyny habarlandy.
Aita keteiik, buǵan deiin «Qaztemirtrans» kompaniiasynyń tórt qyzmetkeri para alý deregi boiynsha sottalǵany týraly aqparat taraǵan bolatyn.
