Qazaqstanda ustalǵan azamattar ushaqty alyp ketýdi josparlaǵan, - dep jazady Tengrinews.kz tilshisi. Bul týraly UQK antiterroristik ortalyq shtabynyń tóraǵasy Sáken Myńbaev habarlady.
Onyń aitýynsha, radikaldar toby Almaty oblysynda Qorǵanys ministrligi men Shekara qyzmetiniń áskeri bólimine, kúsh qurylymdarynyń qyzmetkerleri men Qazaqstan musylmandary dini basqarmasyna qarýly shabýyl jasamaqshy bolǵan.
"18 tamyzda Qyrǵyzstannyń eki azamaty men osyǵan deiin bizdiń otandastarymyzdyń ólimi úshin sottalǵan eki azamat ustalǵan bolatyn. Olar qylmystyq toptyń basshysy etip qyrǵyzstandyq azamatty taǵaiyndaǵan. Qalǵandary óz ishinde mindetterin bólisip alǵan. Buǵan qosa, qazaqstandyq azamattardyń biri óz-ózin jarmaqshy boldy", - dedi spiker Astanada ótip jatqan brifingte.
"Qoǵam arasynda shý shyǵarý úshin olar adam kóp shoǵyrlanǵan aimaqtarda terakt jasamaqshy boldy. Sonymen qatar, Taldyqorǵan áýejaiyn tintip, tekserip onda azamattyq jáne áskeri ushaqty qalai ushyryp ketýge bolatynyn zerttegen. Olar 2001 jyldyń 11 qyrkúieginde AQSh-taǵy shabýylǵa uqsas terroristik akt uiymdastyrýdy kózdedi", - dedi Sáken Myńbaev.
Myńbaevtyń aitýynsha, ustalǵan azamattar terroristik akt jasaýdan buryn nelikten shabýyl jasaýdy josparlaǵanyn videoǵa túsirip, Internetke júktemekshi bolǵan.
Sonymen qatar, ol oq atatyn qarýlardy satyp alý úshin ustalǵan azamattardyń aqsha izdegenin málimdedi. "Olar qaraqshylyq arqyly sharýa qojalyǵynyń basshylarynan jáne mikronesielik uiymdardyń aqshalaryn almaq boldy. Tintý jumystary barysynda ózin-ózi jarýǵa qajetti himiialyq zattar tabyldy", - dedi spiker.
Aita keteiik, qazirgi ýaqytta ustalǵandarǵa qatysty sotqa deiingi tergeý jumystary júrgizilip jatyr.
