Foto: Qasqa Jol / Qasqa jol
Biyl jazda qurǵaqshylyq bop, mal qyrylǵan Mańǵystaý óńirine óz erkimen shóp jetkizgen, sondai-aq elden kómek jinaýǵa at salysqan Qurmet Talapqazy tegin oqý quqyǵyna ie boldy, dep habarlaidy "Ult aqparat".
Buǵan deiin qoǵam belsendileri erikti retinde elge tanymal bolǵan azamattyń joǵary oqý ornynda bilim alýyna múmkindik jasalýyn surap, áleýmettik jelide ýniversitet rektorlaryna úndeý jariialaǵan edi.
"Bilim jáne ǵylym ministriniń joǵary oqý oryndary rektorlarymen ótkizgen jinalysynda Shymkent qalasyndaǵy M. Áýezov atyndaǵy Ońtústik Qazaqstan ýniversitetiniń basshylyǵyna qala turǵyny Qurmet Talapqazyǵa tegin oqý quqyǵyn berý múmkindigin qarastyrý tapsyryldy.
Búgin Qurmet Talapqazy M. Áýezov atyndaǵy Ońtústik Qazaqstan ýniversitetinde tegin oqi alady degen sheshim qabyldandy", - delingen Áýezov atyndaǵy Ońtústik Qazaqstan Ýniversitetiniń Facebook-tegi paraqshasynda.
Bilim jáne ǵylym ministrliginiń baspasóz hatshysy Móldir Ábdýálievanyń aitýynsha, ministr Ashat Aimaǵambetov Qurmet Talapqazymen telefon arqyly sóilesip, oǵan tilektes ekenin jetkizgen.
Eske salsaq, Shymkent qalasynyń 25 jastaǵy turǵyny Qurmet Talapqazy elimizdiń batysyndaǵy qýańshylyqqa tap bolǵan maldy aýyldarǵa jem-shóp jiberý úshin búkil jumysyn tastap, qoǵamdyq bastamaǵa muryndyq bolǵan edi.
Keiin onyń bastamasyna Aýyl sharýashylyǵy ministrligi qulaq asyp, «Qazaqstan temir joly» ulttyq kompaniiasyn kómekke tartqan bolatyn.
