Pavlodar oblysy bas sanitar dárigeriniń Qurban ait kezindegi karantin sharalary týraly jańa qaýlysy jariialandy, dep habarlaidy "Ult aqparat".
Qaýly boiynsha óńirde menshik nysanyna qaramastan barlyq uiymdarda, sondai-aq jeke menshik úiler men medreselerde adamdar kóp jinalatyn is-sharalardy ótkizýge tyiym salynatyn boldy.
«Avtokólikterden jáne jeke menshik úi ielikterinen mal satýǵa tyiym salynsyn», - dep jazylǵan qujatta.
Sondai-aq, qurbanǵa shalynatyn maldy satý jáne soiý jumystary tek veterinariialyq qyzmettiń resmi qorytyndysyn alǵan arnaiy pýnkter men alańdarda júrgizý qajettigi kórsetkilgen.
Atalǵan mal soiý pýnkterinde kúsheitilgen veterinariialyq-sanitariialyq baqylaý men qadaǵalaý júrgiziletini aitylǵan.
«Qurbandyq shalýdy Qurban2021.kz saityna ótinim bere otyryp, onlain-rejimde ótkizilsin. Muqtaj adamdarǵa qurbandyq etin taratý isin oǵan tartylǵan adamdardy jeke qorǵanysh quraldarymen qamtamasyz ete otyryp, tez buzylatyn ónimderdi tasymaldaý jáne saqtaý jónindegi sanitariialyq-epidemiologiialyq erejelerdiń talaptaryn saqtaý arqyly uiymdastyrý kerek», - delingen qaýly mátininde.
Qaýly 16 shilde kúni saǵat 00:00-den bastap 23 shildege deiin kúshinde bolady.
