Nur-Sultan qalasynyń bas sanitar dárigeri Sarhat Beisenova elordada Qurban ait ótkizý talaptaryn túsindirdi, dep habarlaidy QazAqparat.
«Turǵyndar arasynda COVID-19 aýrýynyń joǵary deńgeiin eskere otyryp, men Nur-Sultan qalasynda Qurban aitty merekeleý kúnderindegi shekteý sharalary týraly» qaýlyǵa qol qoidym. Qurbandyq shalý rásimin onlain ótkizý (qurban2021.kz saity) belgilenip, kúsheitilgen sanitariialyq-epidemiiaǵa qarsy, sanitariialyq-profilaktikalyq is-sharalardy saqtai otyryp, adamdardyń jappai jinalýyn boldyrmai, mindetti túrde betperde kiiý men áleýmettik qashyqtyqty saqtai otyryp, arnaiy bólingen oryndarda (iaǵni, mal soiý pýnktterinde) uiymdastyrý jáne ótkizý qarastyrylǵan», - dedi spiker Nur-Sultan qalasynyń ákimdigindegi brifingte.
Meshitter aýmaǵynda ashyq aýada ótkiziletin is-sharalardy qosa alǵanda, buqaralyq is-sharalardy, onyń ishinde «Ait namazy» ujymdyq namazyn ótkizýge, «Qurban ait» merekesine arnalǵan buqaralyq sharalardy ótkizýge jáne qatysýǵa, onyń ishinde úide de ótkizýge tyiym salynady.
Sonymen birge, qala aýmaǵynda sanitarlyq baqylaý men qadaǵalaý kúsheitiledi. Qazirgi ýaqytta alystan nemese tutynýshy tapsyrysymen qurbandyq shalý algoritmi barlyq sanitarlyq talaptardy saqtaýyn eskere otyryp pysyqtalýda.
«Mal soiý oryndarynda sanitarlyq talaptardyń saqtalýyn sanitarlyq jáne veterinarlyq qyzmet mamandary qamtamasyz etedi. Barlyq basqa jerlerde mal satýǵa jáne jeke sektorlarda qurbandyq shalýǵa tyiym salynady. Sonymen qatar, biz turǵyndardy jaqyndary men týystaryna aittap barýdan, kópshilik jiyndardan bas tartýǵa shaqyramyz. Bul sharalar qala turǵyndary arasynda koronavirýs infektsiiasyn juqtyrý jáne taralý qaýpin boldyrmaý úshin qabyldandy. Árqaisyńyzdan kórsetilgen sharalarǵa túsinistikpen qarap, shydamdylyq tanytýdy suraimyn», - dedi Sarhat Beisenova.
