Qazaqstan Respýblikasynyń Prezidenti Qasym-Jomart Toqaev I jáne II dárejeli «Dańq» ordeni men ál-Farabi atyndaǵy ǵylym men tehnika salasyndaǵy memlekettik syilyq iegerlerin marapattady, dep habarlaidy QazAqparat.
«I dárejeli «Dańq» ordeni bizdiń memleketimizdiń arnaiy qyzmetterin qalyptastyrýǵa úles qosqan Bolat Baekenovke tapsyrylady. ál-Farabi atyndaǵy ǵylym men tehnika salasyndaǵy memlekettik syilyq Kúnsulý Zakariia men Amangeldi Sadanovqa beriledi. Kúnsulý Zakariia QazVac koronavirýsyna qarsy otandyq vaktsina jasaǵan jáne qazir birneshe uqsas preparattardy jasap jatqan ǵalymdar tobyn basqarady. Amangeldi Sadanov bizdiń elimiz úshin jańa jáne ózekti baǵyt – Biotehnologiia men topyraq mikrobiologiiasyn zertteitin ǵylymi mektep qurdy», - dedi Memleket basshysy memlekettik nagradalar iegerlerin marapattaý rásiminde.
Sonymen birge, II dárejeli «Dańq» ordeni QR Bas prokýrorynyń orynbasary Bolat Dembaevqa, Ulttyq qaýipsizdik komiteti tóraǵasynyń orynbasary Dáýlet Erǵojinǵa jáne QR Tótenshe jaǵdailar ministri Iýrii Ilinge berildi.
«Táýelsizdiktiń 30 jyldyǵy qarsańynda, osyndai saltanatty jiynda joǵary dárejeli memlekettik marapat alǵanym – men úlishn úlken mártebe. Osyndai kúrdeli kezeńniń qiynshylyqtarynan ótip, elimiz joǵary deńgeige kóterildi. Onyń ishinde osy dertke ǵana tótep bermei, óz vaktsinamyz QazVac-ty ázirlep, adamzatty qorǵaý úshin barlyǵyn saldyq. Qurmetti Qasym-Jomart Kemeluly, Qazaqstan ǵylymynyń aldyna qoiǵan tapsyrmańyzdy bizdiń ǵalymdarymyz buljytpai oryndady. Mundai joǵary dárejege tek qana sizdiń qoldaýyńyzben, Úkimettiń qoldaýymen barsha kózi ashyq kókiregi oiaý ǵalymdardyń qosqan úlesimen jettik. Qurmetti áriptester, kele jatqan Táýelsizdik kúni tuǵyrly bolsyn!», - dedi Kúnsulý Zakariia.
