Reseidiń Uly Petr atyndaǵy Antropologiia jáne etnografiia mýzeii (Kýnstkamera) Keiki batyrdyń basyn qaitarýǵa daiyn. Bul týraly «Radio Baltikaǵa» bergen suhbatynda mýzei direktorynyń orynbasary Efim Rezvan aitty.
Onyń aitýynsha, eksponatty Resei prezidentiniń buiryǵy boiynsha Qazaqstanǵa qaitarýy múmkin eken. Mýzei basshysy Qazaqstannyń Peterbýrgtaǵy konsýlyna qaitarý úshin qandai jumystar isteý kerektigin túsindirip berdi.
«Keiki batyrdyń basy bizde shynymen bar. Biz ony eshqashan jasyrǵan emespiz. Barlyǵy jaqsy biledi. Eger buiryq shyqsa, Qazaqstanǵa berýge daiynbyz», – deidi Rezvan.
Mýzei direktorynyń orynbasary Kýnstkamerada biraq Kenesary hannyń basy joq ekenin aityp otyr. Áli kúnge Kenesary hannyń basy qaida ekenin bilmeimiz deidi.
«Bizge Qazaqstannyń Mádeniet jáne sport ministriniń orynbasary keldi. Oǵan barlyq muraǵattardy kórsettik. Sondai-aq qazaqstandyq taǵy bir áriptesimiz jeke ózi barlyq qujatty tekserip kórdi. Sol kezde Kenesarynyń basy eshqashan bolmaǵanyn tekserip bildi», – deidi Rezvan.
Aita keteiik, juma kúni QR Premer-ministri Kárim Másimov RF Úkimet basshysy Dmitrii Medvedevpen kezdesý barysynda Kenesary men Keiki batyrdyń basyn Qazaqstanǵa qaitarý týraly máseleni kótergen bolatyn.
Dmitrii Medvedev bul máseleni anyqtap, sheshý úshin qajetti tapsyrmalar beretinin aitty.
«Men aýyzsha jáne eger qajet bolsa, jazbasha tapsyrma berip, bul máseleniń anyq-qanyǵyn anyqtaityn bolamyn», - dep jaýap berdi D.Medvedev K.Másimovtiń ult kósemderiniń múrdelerin jerleý úshin Qazaqstanǵa qaitarý týraly ótinishine.
Aita keteiik, Keiki (Nurmaǵanbet) Kókembaiuly (1871-1923) - 1916 jylǵy Torǵaida bolǵan ult-azattyq kóterilisiniń batyry, ataqty mergen. Orta júz quramyndaǵy Qypshaq taipasynyń Qulanqypshaq rýynan shyqqan. Qostanai oblysy Amankeldi aýdanynyń Baitýma qopasynda dúniege kelgen. Azan shaqyrylǵan shyn aty - Nurmaǵambet. Keiki Jylanshyq bolysynyń alpaýyty R.Shashambaiulynyń malyn qoryp, dushpandaryna attandyratyn jigiti bolǵan. Jastaiynan ańshy, mergendigimen, ójettigimen aimaqqa tanylǵan. Onyń quralaidy kózge atqan mergendigine sai el aýyzynda «Amangeldiniń kózi mergen, Keikiniń qoly mergen» degen sipattama saqtalǵan.
