- «Qunanbai» filmi 5-11 qyrkúiek aralyǵynda Qazanda ótetin HII Qazan halyqaralyq musylman kinosy festivaline qatysady, dep habarlady «Qazaqfilm» AQ baspasóz qyzmeti. Kartina rejisseri Qazaqstannyń halyq ártisi, QR Memlekettik syilyǵynyń laýreaty Doshan Joljaqsynov.
«Qunanbai» filminde 1804 jyly Semei oblysy, Shyńǵystaý aýylynda týǵan Qunanbai Óskenbaiulynyń taǵdyry baiandalady. Ol qara qyldy qaq jarǵan ádil bi bolǵan, onyń uly Abai óz shyǵarmalarymen Qazaqstandy jáne qazaq halqyn álemge tanytty.
HII Qazan halyqaralyq musylman kinosy festivaline qatysý úshin 50 eldiń rejisserleri men prodiýserlerinen 700-den astam ótinim kelip túsken, al konkýrstyq baǵdarlamaǵa álemniń 33 elinen oiyn, dokýmentaldy jáne animatsiialyq 60 film irikteldi.
Qazaqstandyq kartinamen qatar, saiysqa Resei, Iran, Qytai, Serbiia, Arab ámirlikteri, Qyrǵyzstan, Bangladesh, Malaiziia elderiniń kartinalary qatysady.
Konkýrstyq baǵdarlamadan bólek, kórermenderdi konkýrstan tys baǵdarlamalar kútedi. Festival aiasynda kino qairatkerlerimen sheberlik saǵattary, festival qatysýshylarymen shyǵarmashylyq kezdesý, kino óneriniń ózekti máselelerine arnalǵan dóńgelek ústelder, baspasóz konferentsiialary ótedi.
Konkýrstyq baǵdarlamada qazylyq etetinder: rejisser, stsenarist, prodiýser Syddyq Barmak (Aýǵanstan/Frantsiia), rejisser, kinooperator Osman Saparov (Túrkmenstan), rejisser, stsenarist Iýsýp Razykov (Ózbekstan/Resei) jáne kinooperator Valerii Sevastianov (Tatarstan). HII Qazan halyqaralyq musylman kinosy festivalindegi ádil qazy alqasynyń tóraǵasy - tanymal kinorejisser, Resei halyq ártisi, KSRO Memlekettik syilyǵynyń laýreaty Aleksandr Proshkin.
