Almatyda aralas jekpe-jek sheberi Qýat Hamitovqa qatysty sot úkimi shyqty, dep habarlaidy "Ult aqparat".
"Hamitov videosy arqyly bilik ókilderine belsendi túrde baǵynbaýǵa shaqyrǵan. Sottalýshy Hamitov jasaǵan áreketin tolyq moiyndady. Qýat Hamitov Qylmystyq kodekstiń 272-babynyń 3-bóligi boiynsha kináli dep tanylyp, alty aiǵa bas bostandyǵyn shekteý týraly úkim taǵaiyndaldy", - dedi sýdia.
Sheshim shyǵarý barysynda sot Hamitovtyń jasaǵan qylmysynyń sipaty men qaýiptilik dárejesin, jeke basynyń derekterin, qylmys jasaǵanǵa deiingi jáne keiingi minez-qulqyn eskerip, kinásin tolyq moiyndaǵanyn, onyń buryn sotty bolmaǵanyn eskerdi.
Buǵan deiin Hamitov sottaǵy sońǵy sózin aitty. Ol ózine qandai úkim shyqsa da jekpe-jekke qatysýy úshin shetelge shyǵýǵa ruqsat surady.
"El namysyn qorǵap júrgennen keiin meniń alǵa qoiǵan maqsatym, josparym bar. Sot qandai jaza kesse de, men úshin eń bastysy shetelge shyǵýǵa múmkindik berse boldy", - dedi Hamitov.
Aita keteiik, Almaly aýdany sotynda Qylmystyq kodekstiń 272-babynyń 3-bóligi ("bilik ókilderiniń zańdy talaptaryna belsendi túrde baǵynbaýǵa jáne jappai tártipsizdikke shaqyrý ne jappai tártipsizdikke arandatý, sol siiaqty azamattarǵa zorlyq-zombylyq jasaýǵa shaqyrý") negizinde Qýat Hamitovke qatysty qylmystyq is qaraldy.
Bul bap boiynsha úsh jylǵa deiin bas bostandyǵyn shekteý ne sol merzimge bas bostandyǵynan aiyrý jazasy qarastyrylǵan.
Aita keteiik, 2020 jyly qyrkúiekte sportshy dezinfektsiia jasaýshylar "halyqty ýlap jatyr" dep málimdep, olardy uryp-soǵýǵa úndedi.
Keiinnen sportshy ol videonyń ázil retinde túsirilgenin aitty.
"Dezinfektsiia týraly tarap ketken videoǵa qatysty aitarym, ol – qaljyń retinde túsirilgen video. Men eshkimdi jappai kóteriliske shaqyrmaimyn. Ondai áreket isteýge eshkimdi shaqyrǵan emespin jáne ondai áreket istemeńizder. Elimiz aman, jurtymyz tynysh bolsyn", - dedi Hamitov.
