Ál-Farabi atyndaǵy Qazaq ulttyq ýniversitetine Qazaqstan Respýblikasynyń Memlekettik hatshysy Qyrymbek Kósherbaev «Kreativti indýstriiany damytýdyń keleshegi» taqyrybynda jastarmen kezdesý ótkizdi, dep habarlaidy "QazAqparat" HAA.
Sharaǵa Qazaqstan Respýblikasy Premer-Ministriniń orynbasary Eraly Toǵjanov, QR Bilim jáne ǵylym vitse-ministri Qýanysh Erǵaliev, Qazaqstan Respýblikasynyń Ulttyq ekonomika vitse-ministri Álisher Ábdiqadyrov, ǵalymdar, ýniversitettiń oqytýshy-professorlary men stýdentter qatysty.
Kezdesý barysynda Qyrymbek Kósherbaev Memleket basshysy Qasym-Jomart Toqaevtyń kreativti indýstriiany damytý maqsatynda bergen tapsyrmasyna sáikes atqarylǵan jumystarǵa toqtaldy.
«Memleket basshysynyń tapsyrmasyna sáikes bul baǵytta alǵashqy jumystar bastaldy. Úkimet kreativti indýstriiany damytý boiynsha jobalyq keńse qurdy. Qarasha aiynda «2021-2025 jyldarǵa arnalǵan kreativti indýstriiany damytý tujyrymdamasy» qabyldandy. Soǵan sáikes, Nur-Sultan, Almaty jáne Shymkent qalalarynda biznes-inkýbatorlar, ortalyqtar men habtar qurý qarastyrylǵan. Almaty qalasynda qurylatyn biznes-inkýbatorǵa Ál-Farabi atyndaǵy Qazaq ulttyq ýniversiteti negiz bolýy kerek dep esepteimin. Oǵan tolyq múmkindikter bar. Jalpy kez kelgen qoǵamda kreativti ideialardy týdyratyn orta ol-joǵary oqý oryndary men ondaǵy entýziast jas ǵalymdar. Bul turǵyda Ál-Farabi atyndaǵy Qazaq ulttyq ýniversiteti - qazaqtyń intelektýaldy tarihynda burynnan kóshbasshy», – dedi Memlekettik hatshy.
Sonymen qatar, óz sózinde Qyrymbek Kósherbaev kreativti indýstriiany damytý úshin básekege qabiletti mamandardy daiyndaý qajettigin jetkizdi.
«Kreativti indýstriiany damytý úshin kadr daiyndaý mańyzdy. Máselen, Batys elderinde aqyn-jazýshylardyń kitaptaryn jarnamalap, satý isimen ádebi agentter ainalysady. Sol sekildi bizdiń de qalamgerlerdiń týyndylaryn shet tilderine aýdaryp, naryqqa shyǵarýmen ainalysatyn bilikti mamandardy daiarlaý qajet. Budan bólek, tsifrly jańa tehnologiianyń qarqyndy damýy da jańa mamandyqtardyń, kýrstardyń ashylýyn mindettep otyr», - dedi Qyrymbek Kósherbaev.
Shara barysynda QazUÝ rektory Janseiit Túimebaev búgingi kezdesý ýniversitettiń talantty jastary úshin mańyzy zor ekenin atap ótti.
«Memlekettiń keleshegin qalyptastyratyn-básekege qabiletti, bilimdi jastar. Búgingi tańda bizdiń jas ǵalymdarymyz, talantty ónerpazdarymyz elimizdi halyqaralyq deńgeide tanytýda. Shyǵarmashylyq indýstriia-jahandyq ekonomikanyń eń jyldam damyp kele jatqan baǵyttarynyń biri. Sońǵy onjyldyqta shyǵarmashylyq salalar qoǵamnyń áleýmettik jáne mádeni damýyna erekshe áser etti. Osy oraida, Qazaqstandaǵy kreativti indýstriiany damytý máselelerine arnalǵan búgingi kezdesýdiń, ásirese bizdiń talantty jastarymyz úshin mańyzy óte zor», – dedi ýniversitet basshysy.
Kezdesý ashyq dialog formatynda ótti. Stýdentter Memlekettik hatshy Qyrymbek Kósherbaevqa ózderin qyzyqtyrǵan suraqtaryn qoiyp, kreativti indýstriiany damytý boiynsha jańa ideialaryn ortaǵa saldy.
Zań fakýltetiniń 1 kýrs doktoranty Aqerke Jaqysh kreativti indýstriiany damytýǵa úles qosatyn jastar úshin jańa bilim berý baǵdarlamasyn iske qosý qajet ekenin atap ótti.
«Osy maqsatta kreativti salalar úshin damý qoryn qurý jáne investitsiialyq jáne qarjylyq saiasatta, salyq salýda, import pen eksportta belgili bir yntalandyrýlardy qoldaný qajet dep sanaimyz. Sondai-aq, kreativti indýstriianyń damýyna óz úlesin qosatyn jas talanttardy oqytý úshin jańa bilim berý baǵdarlamalaryn ázirleýdi usynamyz», - dedi Aqerke Jaqysh.
Kezdesý aiasynda memlekettik hatshy Qyrymbek Eleýuly bastaǵan delegatsiia Ál-Farabi kitaphanasyndaǵy ýniversitet ǵalymdarynyń eńbekteri qoiylǵan ǵylymi jetistikter kórmesimen tanysty.
