Foto: gov.kz
Aida Balaeva Qazaqstan Respýblikasynyń Ulttyq ortalyq mýzeiindegi «Altyn Orda» jańa kórme zalymen tanysty. Ekspozitsiia qazaq memlekettiliginiń bastaýy bolǵan tarihi mańyzdy kezeńderdiń birine arnalǵan. Bul týraly QR Mádeniet jáne aqparat ministriginiń baspasóz qyzmetine silteme jasap Ult.kz habarlaidy.
Ekskýrsiia barysynda Premer-ministrdiń orynbasary – Mádeniet jáne aqparat ministri mýzei ekspozitsiialaryn uiymdastyrýdaǵy tereń ári ǵylymǵa negizdelgen tásilderdi atap ótip, Altyn Orda murasyn keler urpaqqa keńinen nasihattaýdyń mán-mańyzyna toqtaldy.
Jańa zal ashýdaǵy basty maqsat – kópshilikti XIII–XIV ǵasyrlardaǵy Altyn Ordanyń tarihymen, mádenietimen tanystyrý, onyń qazaq memlekettiliginiń bastaýy retindegi rólin kórsetý jáne qoǵamnyń tarihi sanasyn qalyptastyrý.
Kórmede mýzei qorynan alynǵan 200-ge jýyq jádiger usynylǵan. Qalalyq mádeniet bólimine turmystyq buiymdar, zergerlik áshekeiler, Almaty oblysy Sheńgeldi aýyly mańynan tabylǵan Shaǵatai áýleti aqsúiekteriniń saltanatty kiimindegi jibek matalardyń qiyndysy qoiylǵan. Áskeri óner bóliminde qarý-jaraq elementteri kórsetilgen. Memlekettik qurylymǵa arnalǵan bólimde Altyn Ordanyń basqarý júiesi, bileýshiler genealogiiasy jáne Qazaq handyǵymen tarihi bailanysy baiandalady.
