Ońtústik Qazaqstan oblysyna jumys sapary aiasynda Kárim Másimov «PetroQazaqstan Oil Prodakts» JShS-ne bardy, dep jazady Pm.kz.
Qazaqstannyń munai óńdeý zaýyttaryn jańǵyrtýdyń úkimettik baǵdarlamasyna engen aýqymdy jobany júzege asyrý barysy týraly Premer-Ministrge kásiporyn prezidenti Ts. Shi men birinshi vitse-prezidenti A. Turysbekov baiandady.
«Shymkent munai óńdeý zaýytyn jańǵyrtý jáne jóndeý» jobasy 2011 jyly bastaldy, barlyq jumystardy 2017 jyldyń sońynda aiaqtaý josparlanǵan.
2016 jyldyń qańtar-mamyrynda ShMÓZ óndirgen ónim kólemi aqshalai mánde 22 mlrd teńgeden asty. Jańǵyrtýdan keiin K5 ekologiialyq klastyń (EAEO elderindegi Eýro-5 balamasy) talaptaryna sáikes zaýyt joǵary oktandy benzin shyǵarady. Zaýyttaǵy óńdeý qýattylyǵy 90%-ǵa deiin tazartý tereńdigimen shiki munai 5,2-den 6 mln tonnaǵa deiin ósedi dep kútilýde.
Búgingi tańda Qazaqstanda úsh MÓZ - Pavlodar, Atyraý jáne Ońtústik Qazaqstan oblystarynda jumys jasaidy. Degenmen, ishki naryqtyń suranysyn olar qamti almaidy.
Otandyq otyn-energetikalyq naryqty damytý máselelerine Úkimet Elbasynyń tapsyrmasy boiynsha erekshe kóńil bóledi. Óńirlerge jumys sapary barysynda Premer-Ministr Pavlodardaǵy jáne Atyraýdaǵy MÓZ-na baryp, Qazaqstan úshin mańyzdy óndiristi jańǵyrtý jáne jóndeý barysymen tanysty. Budan ózge, Atyraýda Kárim Másimov otandyq munai servisiniń ózekti máseleleri boiynsha keńes ótkizdi. Keńes qorytyndysy boiynsha Premer-Ministr eki jumys tobyn qurýdy tapsyrdy, olar bir ailyq merzimde ózekti máselelerdi jinaqtap, olardy sheshýdiń naqty usynystaryn ázirleýleri tiis.
Qazaqstannyń barlyq úsh MÓZ-yn jańǵyrtý 2018 jylǵa qarai QR avtokólik otyny naryǵynda import almastyrýdy qamtamasyz etedi.
Aita keteiik, Ulttyq ekonomika ministrliginiń málimetinshe, Qazaqstanda 2016 jylǵy qańtar-maýsymda 1,527 million tonna benzin (2015 jyldyń sáikes kezeńinen 13,6%-ǵa artyq), 2,370 million tonna dizel otyny (10,6%-ǵa ósý), 1,408 million tonna jaǵylatyn mazýt (13,5%-ǵa tómendeý) óndirildi.
Birinshi jartyjyldyqta Qazaqstan MÓZ aldyńǵy jylǵa qaraǵanda 13,6%-ǵa artyq benzin jáne 10,6%-ǵa artyq dizel óndirdi.
2014 jyly 29,4%-ǵa jáne 2015 jyly 15,8%-ǵa tómendeýden keiin aǵymdaǵy jyldyń birinshi jartysyndaǵy oń trend salaǵa jiger berdi.
"Ult aqparat"
