- QR Premer-Ministri Kárim Másimov Batys Qazaqstan oblysyna jumys sapary aiasynda Oral áýejaiynyń qaýipsizdik júiesimen tanysty, dep habarlaidy pm.kz.
Kólik infraqurylymynyń strategiialyq mańyzdy nysandarynyń, birinshi kezekte, áýejailar men temirjol vokzaldarynyń qaýipsizdik máselelerine elimizde erekshe kóńil bólinedi.
Qaýipsizdik sharalaryn kúsheitip, qamtamasyz etý qajettigi týraly QR Prezidenti N. Nazarbaev biyl 5 maýsymda Aqtóbede jáne 18 shildede Almatyda oryn alǵan oqiǵalarǵa bailanysty ótken Qaýipsizdik keńesi otyrysynda aitty.
«Basqa elder úlgisinde barlyq áýejailardy, avto- jáne temirjol vokzaldaryn zamanaýi tekserý júielerimen, aýlalardy - sapaly beinebaqylaýmen qamtamasyz etý qajet. Bul sharalardyń barlyǵy azamattarǵa qolaisyzdyq týǵyzbaýy tiis», - dep atap ótti Memleket basshysy.
Jumys barysynda terrorizm qateri faktoryn eskerýmen qaýipsizdik sharalaryn kúsheitý týraly nusqaý barlyq tiisti uiymdarǵa, onyń ishinde Qazaqstannyń áýejailary men áýe kompaniialaryna jiberildi.
Premer-Ministr Oral áýejaiyn kórip, onyń qaýipsizdik júiesimen tanysty, áýe ailaǵynyń shtattyq jumysyn qamtamasyz etý sharalary týraly baiandamany tyńdady.
Oral halyqaralyq áýejaiy 1972 jyly paidalanýǵa berilgen. Aerovokzal saǵatyna 200 jolaýshyny, al terminal 100 jolaýshyny ótkizýge qaýqarly. Áýejai kesheni qajetti arnaiy tehnikamen jabdyqtalǵan jáne áýe kemelerine qyzmet kórsetetin, jolaýshylar jáne ushý-qoný jolaǵy men perron jumysyn qamtamasyz etetin personaldar qarastyrylǵan.
Aita keteiik, 2014 jyly áýejaidyń ushý jolaǵyn qaita jóndeý jumystary júrgizile bastalǵan bolatyn, jyl sońyna qarai, jóndeý jumystarynyń birinshi kezeńi aiaqtalǵannan keiin áýejai óz jumysyn jandandyrdy. Ekinshi kezeń 2015 jyldyń mamyr aiynda bastalyp, sol jyldyń sońynda aiaqtalǵan.
