Foto: pixabay.com
Qostanaida áiel burynǵy jubaiyn asyrandy qyzyna jynystyq sipattaǵy áreketter jasady dep aiyptap otyr. Onyń aitýynsha, bul jait sot protsesi barysynda belgili bolǵan. Alaida qozǵalǵan qylmystyq is keiin quqyq buzýshylyq quramynyń bolmaýyna bailanysty toqtatylǵan, dep habarlaidy Ult.kz AstanaTV arnasyna silteme jasap.
Qostanai turǵynynyń sózinshe, ol burynǵy kúieýimen birge eki balany náreste kezinen asyrap alǵan. Qazir ul bala 17 jasta, al qyz 11 jasta. Erli-zaiyptylar eki jyl buryn ajyrasqan.
Áieldiń aitýynsha, ajyrasý kezinde balalar ákesin ata-ana quqyǵynan aiyrýdy talap etken. Sol sot protsesi barysynda qyz birneshe jyl boiy asyrandy ákesiniń tarapynan jynystyq sipattaǵy áreketterge ushyraǵanyn aitqan.
Belgili sebepterge bailanysty áiel óz aty-jónin jariialamaýdy jáne júzin kórsetpeýdi suraǵan.
Onyń sózinshe, sot asyrap alýdy toqtatý isi boiynsha psihiatriialyq-psihologiialyq saraptama taǵaiyndaǵan. Saraptama barysynda psiholog qyzdyń psihologiialyq jaraqat alǵanyn anyqtaǵan.
Áieldiń aitýynsha, Pavlodardan shaqyrylǵan maman qyzben jeke sóilesip, onyń senimine kirgennen keiin bala keibir jaittardy aityp bergen.
Osydan keiin áiel burynǵy jubaiyna qatysty politsiiaǵa aryz jazǵan. Alaida Qostanai oblystyq politsiia departamenti qylmystyq is qozǵalǵanymen, keiin toqtatylǵanyn málimdedi.
«Is boiynsha barlyq mán-jai jan-jaqty, tolyq ári obektivti zertteldi. Nátijesinde Qazaqstan Respýblikasy Qylmystyq-protsestik kodeksiniń 35-baby 1-bóligi 2-tarmaǵyna sáikes qylmystyq quqyq buzýshylyq quramynyń bolmaýyna bailanysty is toqtatyldy», – dep habarlady vedomstvo.
Alaida áiel men onyń advokaty bul sheshimmen kelispeitinin aityp, istiń toqtatylýyna shaǵym túsirmek. Olar isti qaita qarap, kináli tulǵa jaýapkershilikke tartylýy tiis dep esepteidi.
