2021 jyldyń basynan beri Qostanai oblysynyń ónerkásiptik kásiporyndary 860,4 mlrd teńgeniń ónimin óndirdi. Bul týraly Qostanai oblysynyń ákimi Arhimed Muhambetov aitty, dep habarlaidy QazAqparat .
«Jyl basynan oblystyń ónerkásip kásiporyndary 860,4 mlrd teńgeniń ónimin óndirdi. Aitarlyqtai ósim kóbinese indýstriialandyrý jyldarynda investitsiialyq jobalardy iske asyrǵan kásiporyndardyń arqasynda múmkin boldy», - dedi oblys ákimi Ortalyq kommýnikatsiialar qyzmetindegi baspasóz máslihatynda.
Máselen, onyń dereginshe, óńdeý ónerkásibi mashina jasaý ónimderi óndirisin, metall buiymdary óndirisin jáne tamaq ónimderin ulǵaitý esebinen 14,6 paiyzǵa aitarlyqtai ósimdi kórsetip otyr.
«Jalpy, ósý rezervteri retinde, taiaý jyldarǵa arnalǵan, shamamen 6,2 myń jumys orny ashyla otyryp, 2,0 trln teńge turatyn 80 jobalyq pýl qalyptastyryldy. Olar ekonomikanyń indýstriialdyq sektoryn damytýǵa jáne ónerkásiptik óndiris kólemderiniń aitarlyqtai ósýine yqpal etetin bolady», - dedi Arhimed Muhambetov.
