Kólik politsiiasy poiyz jolaýshysynyń 116 mln teńge salynǵan sómkesin urlaý faktisin áshkereledi, dep habarlaidy "Ult aqparat" Kóliktegi politsiia departamentiniń baspasóz qyzmetine silteme jasap.
31 mamyr kúni «Qostanai-Almaty» baǵytymen ketip bara jatqan poiyzdyń 22 jastaǵy jolaýshysynyń sómkesinde 116 900 000 teńge bolǵan. Oiynda bóten eshteńe joq jolaýshy keshkisin uiqyǵa jatyp, Jaqsy stantsiiasyna kelgende oianǵan. Ol poiyz qozǵalǵan kezde aqsha salynǵan sómkesin tappai qalǵan jáne ol týraly birden politsiiaǵa habarlaǵan.
Kóliktegi Politsiia departamenti bastyǵynyń orynbasary Nurjan Álibaevtyń sózinshe, qylmys jóninde habardy alysymen departamenttiń tájiribeli qyzmetkerlerinen jedel tergeý toby qurylǵan.
Qylmyskerdi izdestirý barysynda temirjol kóliginiń barlyq nysandary, sonai-aq jaqyn jerdegi eldimekender tekserildi. Poiyz qyzmetkerleriniń barlyǵynan jaýap alynyp, nátijesinde qylmysty jasaýy yqtimal kúdiktiniń avtoportreti salyndy. 8 maýsym kúni Nur-Sultan qalalyq kólik politsiiasynyń qyzmetkerleri qylmysty jasaýy múmkin degen úshi kúdiktini ustaidy.
«Kúdiktilerdiń turyp jatqan jerine tintý júrgizilip, onyń barysynda 12 620 000 teńge men 198 500 AQSh dollary tabyldy. Aqshanyń bir bóligin kúdiktiler qylmys jasala salysymen eki kólik satyp alýǵa jaratyp úlgergen», - dedi Nurjan Álibaev.
«Kúdiktiler tutqyndaldy. QR QK 188 baby, 4 tarmaǵy, 3 tarmaqshasy negizinde (Iri kólemde jasalǵan urlyq) sotqa deiingi tergeý júrgizilip jatyr. Sonymen qatar kúdiktilerdiń osy tektes ózge de qylmystarǵa qatystylyǵy tekserilip jatyr», - dedi ol.
