Qostanai oblysynda órt sóndirýshiler iri orman órtin úsh kún sóndirdi, dep habarlaidy "Ult aqparat" Qostanai oblystyq tótenshe jaǵdailar departamentine silteme jasap.
«10 shilde kúni saǵat 12:50-de Qostanai aýdanyndaǵy «Prigorodnoe» orman sharýashylyǵy basqarmasynyń aýmaǵynda, Tobyl qalasynan 30 shaqyrym jerde iri orman órti sóndirildi. Órt 8 shilde kúni saǵat 10:40-ta bastalǵan. Qýraǵan shóp, qaraǵai men qaiyń órtendi. Jalynmen kúresti ekpindi jel men ystyq kún raiy qiyndatty», - dep habarlady vedomstvodan.
Jalynmen kúreske TJD kúsh-quraldary, jergilikti atqarýshy organdar jáne politseiler jumyldyrylǵan.
«Orman silemin qorǵaý maqsatynda «Qazáýequtqarý» AQ-nyń MI-8 tikushaǵy tartyldy. Qutqarýshy tikushaq áýeden 60 ret sý shashty, shashylǵan sýdyń kólemi 200-ge jýyq tonnany quraǵan. Aldyn ala esep boiynsha, jalyn 300 ga jerdi sharpyǵan. Órttiń shyǵý sebebi anyqtalyp jatyr», - dep qosyp ótti TJD-dan.
Jalynmen kúres 9 shilde kúngi saǵat 21:00-de jariialanyp, kelesi kúni túske qarai tolyq sóndirildi.
Qaza tapqandar men zardap shekkender joq. Orman órtimen kúreste 315 adam men 40-tan astam tehnika jumyldyrylǵan.
Eske sala ketsek, buǵan deiin Qostanai qalasynyń mańynda iri orman órti sóndirilip jatqany habarlanǵan.
