Qostanai oblysy ákimdiginiń veterinariia basqarmasy óńirdegi aýyldardyń birinde sibir jarasy órship turǵanyn rastady. Atalǵan aýyldaǵy jaǵdai týraly quzyrly vedomstvo basshysy Aqat Shyqtybaev aityp berdi.
Shyqtybaevtyń aitýynsha, 30 maýsymda Denisov aýdany Sverdlov aýyldyq okrýginiń Prirechnoe aýylyndaǵy «Altai» JShS-ǵa tiesili iri qara maldyń materialdaryna PTR ádisimen jasalǵan diagnostikalyq zertteý qarasannyń qozdyrǵyshyn anyqtady.
«Aýdannyń veterinarlyq stantsiiasy veterinariia basqarmasynyń basshylyǵymen jáne baqylaýymen infektsiia oshaǵynan aýrýdy taratpaý boiynsha sharalardy ýaqytyly qabyldady. Mamandandyrylǵan insineratorda qyrylǵan mal óleksesi órteldi. Sondai-aq olar ustalǵan jáne ólgen jerlerdi dezinfektsiialaý jumysy júrgizildi. «Respýblikalyq epizootiiaǵa qarsy jasaqtyń» Qostanai filialy 3 shildeden bastap infektsiia oshaǵynda barlyq joiý sharalaryn oblystyq jáne aýdandyq veterinariialyq inspektsiianyń baqylaýymen júrgizýde», - dep túsindirdi Shyqtybaev.
Búgingi kúni indet faktileri tirkelgen barlyq 4 mal sharýashylyǵy bazasynda jáne olardyń irgeles aýmaqtarynda úi-jai aralyǵyn, astaýlaryn jáne qabyrǵalaryn mehanikalyq tazartý, ákteý jumystary aiaqtaldy.
«Respýblikalyq epizootiiaǵa qarsy otriadtyń kúshimen mal bazalaryna, jaiylym alańdaryna, sondai-aq janýarlar qyrylǵan jerlerge eki ret dezinfektsiia júrgizildi. Barlyq joiý sharalary tolyq kólemde júrgizildi. Denisov aýdanynyń qalǵan aýyldaryndaǵy jáne jalpy Qostanai oblysy boiynsha epizootiialyq jaǵdai turaqty», - dep atap ótti Shyqtybaev.
