2020 jyly Qostanai oblysy 300 mln dollardyń azyq-túligin eksportqa shyǵardy. Bul týraly Qostanai oblysynyń ákimi Arhimed Muhambetov aitty, dep habarlaidy "Ult aqparat".
«Aýyl sharýashylyǵy oblys ekonomikasyndaǵy ekinshi bazalyq baǵyt sanalady. Salada 117 myńnan astam adam eńbek etedi. Bul oblystyń jumyspen qamtylǵan halqynyń jalpy sanynyń 25 paiyzyn quraidy. 2020 jyly 4 mln tonna astyq bastyrdyq. Biyl jazǵy egistik alqaby 4,7 mln gektardy qurady. Onyń ishinde 3,9 mln gektar astyq jáne dándi-burshaqty daqyldar, 590 myń gektar maily daqyldar bar. Sońǵy 5 jylda egistik alqaptary qurylymyn ártaraptandyrý aiasynda maily daqyldar alqaby 1,7 esege artyp, dándi-burshaqty daqyldar alqaby qysqartyldy», - dedi oblys basshysy Ortalyq kommýnikatsiylar qyzmetindegi baspasóz máslihatynda.
Onyń atap ótýinshe, biyl óńirde agroónerkásip keshenin damytýǵa 31,2 mlrd teńge bólindi. Nátijesinde et óndirisi 4,7, al sút 2,5 paiyzǵa artyp otyr. Bólingen qarajat tolyq kólemde igeriletin bolady.
«2020 jyly oblys azyq-túlik ónimderin eksporttaýda respýblikada birinshi orynǵa shyqty. Elimizden tysqary aýmaqqa 300 mln dollardyń azyq-túligin eksportqa shyǵardyq. Bir jyldyń ishinde 1 mln tonna astyq daqylyn, 800 myń tonna ún, 10 myń tonna ósimdik maiyn, shamamen 8 myń tonna sútónimderin, 416 tonna et jáne et ónimderin, 51 mln dana jumyrtqa jáne basqa da azyq-túlik jiberdik», - dedi Arhimed Muhambetov.
