Aqmola oblysynyń ákimi Ermek Marjyqpaev Qosshyǵa qala mártebesin berý jumystary jaiynda baiandady, dep habarlaidy QazAqparat.
«Qosshy aýyly qarqyndy damyp keledi. Eldi meken aýmaǵy keńeitip jatyr, osy oraida tiisti infraqurylym qajet bolyp tur. Qazirgi kezde aýylǵa oblystyq mańyzdaǵy qala mártebesin berýdi qarastyratyn algoritm ázirlendi», - dedi ákim Ortalyq kommýnikatsiialar qyzmetinde.
Sonymen qatar tilshiler Qosshyǵa qala mártebesin berý máselesin qarastyrý qai deńgeide ekeni týraly suraq qoiyldy.
«Bul másele boiynsha jol kartasy jasaldy jáne ol 28 pýnktiden turady, sonyń 21-in oryndadyq. Osy oraida Úkimetpen birlese tiisti jumystar atqarylyp jatyr», - dedi Ermek Marjyqpaev.
Onyń aitýynsha, Qosshyda qazirgi kezde 60 myńnan astam adam turyp jatyr.
«Ony barlyǵy rastap otyr. Elektr energiiasy abonentteri boiynsha jáne basqa da kórsetkishter aiasynda turǵyndar sany shamamen kórinip tur. Alaida qala mártebesin berý úshin sanaq júrgen kezde toqtap qaldyq. Qala mártebesin alý úshin 50 myń tirkelgen turǵyn bolýy kerek. Eki aidan astam ýaqyt boiy osy máselemen ainalystyq, adamdar tirkeýge turǵylary kelmeidi. Olar Nur-Sultan qalasynda tirkeýde turyp, biraq Qosshyda turǵylary keledi», - dedi ákim.
Bul turǵyda ol tiisti jumystar jalǵasyp, Qosshy boiynsha qujat memlekettik ortalyq organdardyń kelisýinde jatqanyn aitty.
