QR Ekologiia, geologiia jáne tabiǵi resýrstar ministrligi Túrkistan oblysynyń Shardara sý qoimasynda qoryqshylarǵa jasalǵan shabýyldyń mán-jaiyn aitty, dep habarlaidy "Ult aqparat".
«Aral-Syrdariia oblysaralyq balyq sharýashylyǵy basseindik inspektsiiasynyń habarlaýynsha, 10 maýsymda shamamen saǵat 14.30-da «Nuraly» JShS balyq sharýashylyǵy qoryqsha qyzmetkerleri Shardara sý qoimasynda reid ótkizgen jáne brakonerlik faktisin anyqtaǵan. Elektr togymen zańsyz balyq aýlaǵandardy ustaý kezinde quqyqbuzýshylar qyzmetkerlerdi uryp-soǵyp, fizikalyq kúsh kórsetken jáne qylmys ornynan qashyp ketken», - dep habarlady QR EGTRM Balyq sharýashylyǵy komitetinen.
QR Qylmystyq kodeksiniń 380-2-babyna sáikes, janýarlar dúniesin qorǵaý jónindegi memlekettik inspektorǵa, janýarlar dúniesin qorǵaý jónindegi mamandandyrylǵan uiym inspektoryna, qoryqshyǵa kúsh qoldanǵany úshin 5 jyldan 10 jylǵa deiin bas bostandyǵynan aiyrý túrinde qylmystyq jaýapkershilik kózdelgen. Osyǵan bailanysty, atalǵan fakti 2021 jylǵy 10 maýsymda sotqa deiingi tergep-tekserýdiń biryńǵai tizilimine tirkeldi.
Budan basqa, elektr togymen balyq resýrstaryn zańsyz óndirgeni úshin QR QJK 335-babynda úsh myń ailyq eseptik kórsetkishke deiin aiyppul salý ne sol mólsherde túzeý jumystary ne segiz júz saǵatqa deiin qoǵamdyq jumysqa tartý ne úsh jylǵa deiin bas bostandyǵyn shekteý ne sol merzimge bas bostandyǵynan aiyrý, múlki tárkilenip, belgili bir laýazymdardy atqarý nemese belgili bir qyzmetpen ainalysý quqyǵynan 5 jylǵa deiin aiyrý jazalary bar.
«Ekologiia, geologiia jáne tabiǵi resýrstar ministrliginiń Balyq sharýashylyǵy komiteti bul oqiǵany erekshe baqylaýǵa aldy, quqyq qorǵaý organdarymen birlesip kúdiktilerdi izdeý, keiinnen kináli adamdardy qylmystyq jaýapkershilikke tartý jumystary júrgizilýde. Sonymen birge, brakonerlikpen kúresti kúsheitý maqsatynda Aral-Syrdariia basseininiń balyq sharýashylyǵy aidyndarynda IIM-men birlesken keń aýqymdy jedel-profilaktikalyq is-sharalar ótkizý máselesi pysyqtalýda», - dedi komitetten.
Eske salaiyq, buǵan deiin Túrkistan oblystyq Politsiia departamenti Shardara sý qoimasynda qoryqshylarǵa shabýyl jasady degen kúdikpen 6 brakoner ustalǵanyn habarlaǵan bolatyn.
