Áleýmettik meditsinalyq saqtandyrý qory jyl sońyna deiin 1,4 mln patsientttiń úiine baryp qyzmet kórsetý úshin emhanadaǵy mobildi brigadalarǵa 7,7 mlrd teńge qarastyrdy, dep habarlaidy "Ult aqparat".
Elimizde Covid-19, pnevmoniiaǵa shaldyqqan, jiti respiratorlyq aýrýdyń belgileri bar patsientterge úide ambýlatoriialyq-emhanalyq kómek kórsetý úshin 3 myńǵa jýyq mobildi brigada quryldy.
Mobildi brigadalar emhana men otbasylyq ambýlatoriia janynan ýaqytsha, tirkelgen adam sanyna qarai 5 myń halyqqa 1 mobildi brigada degen eseppen qurylady.
Mobildi brigadalardyń jumysyn óńirlerdiń densaýlyq saqtaý basqarmasy jergilikti jerlerde uiymdastyrady. Áleýmettik meditsinalyq saqtandyrý qory qarjylandyrady. Halyqqa mobildi brigadalardyń qyzmeti tegin kórsetiledi.
Joǵary temperatýra, JRVI belgileri bar, koronavirýsqa nemese pnevmoniiaǵa kúdigi bar patsient jumys kúnderi saǵat 8.00-den 18.00-ge deiin, al qalǵan ýaqytta (saǵat 18-den keiin, demalys, mereke kúnderi) 103 telefony boiynsha aýmaqtyq emhananyń tirkeý bólimine júgine alady.
Emhananyń tirkeý bóliminde chek-paraqqa qarap patsienttiń jaǵdaiyn baǵalaidy. Operator keiin emhanadaǵy filtr kabinetine ótýge keńes berýi múmkin nemese mobildi brigada uiymdastyrady.
Mobildi brigadanyń quramyna dáriger jáne/nemese medbike, qajet bolǵan jaǵdaida beiindi maman kiredi.
Mobildi brigadalar halyqqa mynadai qyzmetter kórsetedi:
1) patsientti alǵashqy tekserý, aýyrlyq dárejesin baǵalaý;
2) COVID-19 kúdikti patsientterdi jedel jáne PTR-testileý;
3) kórsetkishter boiynsha rentgenografiiaǵa nemese kompiýterlik tomografiiaǵa joldama beredi;
4) qandaǵy otteginiń satýratsiiasy 93% tómendegen kezde naýqastyń tóseginde konsýltatsiialyq top múshesimen aýdio-videokonferentsiia uiymdastyra otyryp, pýlsoksimetriia júrgizý;
5) «COVID-19 Koronavirýstyq infektsiia» diagnostikasy men emdeýdiń klinikalyq hattamasyna sáikes dárilik zattardy taǵaiyndaý;
6) úide emdeý nemese statsionarǵa jatqyzý týraly máseleni sheshý (bul jaǵdaida mobildi brigada jedel járdem brigadasyn shaqyrady).
Jaǵdaiynyń aýyrlyǵyna qarai patsientke mynadai meditsinalyq kómek kórsetiledi:
- ambýlatorlyq distantsiialyq baqylaý: kúndelikti qońyraý shalý (monitoringtik top);
- BMSK dárigeriniń qashyqtyqtan keńes berýi;
- kórsetkishter bolǵan jaǵdaida beiindi dárigerdiń qashyqtyqtan konsýltatsiiasy;
- ambýlatoriialyq tegin dári-dármekpen qamtamasyz etý QR Densaýlyq saqtaý ministrliginiń buiryǵyna sáikes: aýrýhanadan tys pnevmoniia kezindegi eresekter úshin, pnevmoniia, joǵarǵy tynys alý joldarynyń nemese tómengi tynys joldarynyń jiti respiratorlyq infektsiialary, sinýsit/badamsha jáne adenoid aýrýlary kezindegi balalar úshin
- klinikalyq hattama boiynsha tegin dári-dármekpen qamtamasyz etýdi qosa alǵanda, aiǵaqtary bolǵan jaǵdaida úidegi statsionar.
Meditsinalyq saqtandyrý qory qyzmetterdiń sapasyn jaqsartý úshin patsientter shaǵym jáne usynystarmen 1406 bailanys ortalyǵyna júginip, sondai-aq Qoldau24/7 mobildi qosymshasynda shaǵym qaldyra alady.
