Koronavirýs juqtyrýyna bailanysty 112 meditsina qyzmetkerine birjolǵy tólem taǵaiyndaldy. Bul týraly Eńbek ministrligi habarlady.
24 shilde saǵat 18.00-degi jaǵdai boiynsha COVID-19-pen kúreske tartylǵan 112 meditsina qyzmetkerine Memlekettik áleýmettik saqtandyrý qorynan (budan ári – MÁSQ) koronavirýstyq infektsiiany nemese virýstyq pnevmoniiany juqtyrýyna bailanysty 2 mln. teńge mólsherinde birjolǵy áleýmettik tólem taǵaiyndaldy. Aqshalai qarajat qazirdiń ózinde 73 meditsina qyzmetkerine aýdaryldy, taǵy 39-yna tólemge jiberildi.
Joǵaryda kórsetilgen tólemaqy alýǵa quqyǵy bar meditsina qyzmetkerlerin oblystardyń jáne respýblikalyq mańyzy bar qalalardyń densaýlyq saqtaý basqarmalaryndaǵy arnaiy komissiialar aýrý juqtyrýyn tekserý nátijeleri boiynsha anyqtaidy. Barlyq ótinimderdi Qazaqstan Respýblikasy Densaýlyq saqtaý ministrligi (budan ári – DSM) jinaqtaidy.
DSM-den MÁSQ-ǵa tólemge barlyǵy 123 ótinim kelip tústi. Óńirler boiynsha eń kóp ótinimder Almaty qalasynan (46), Almaty (38) jáne Soltústik Qazaqstan oblystarynan (10) kelip tústi.
Qalǵan 11 ótinim boiynsha derekterdi DSM qosymsha tekserýde. Naqtylanǵan málimetterdi usynǵannan keiin bul meditsina qyzmetkerlerine dereý tólem taǵaiyndalady.
Esterińizge sala keteiik, QR Eńbek jáne halyqty áleýmettik qorǵaý ministri men QR Densaýlyq saqtaý ministriniń 9 sáýirdegi «Densaýlyq saqtaý uiymdarynyń COVID-19 koronavirýstyq infektsiiasyna qarsy kúres jónindegi epidemiiaǵa qarsy is-sharalarǵa tartylǵan qyzmetkerleri atalǵan infektsiiany juqtyrǵan nemese odan qaitys bolǵan jaǵdaida olarǵa birjolǵy áleýmettik tólemdi júzege asyrý qaǵidalaryn bekitý týraly» birlesken buiryǵyna aǵymdaǵy jyldyń 22 shildesinde engizilgen ózgeristerge sáikes joǵaryda kórsetilgen tólem:
– koronavirýstyq infektsiia nemese virýstyq pnevmoniia juqtyrǵan meditsina qyzmetkerlerine – 2 mln. teńge;
– COVID-19 koronavirýstyq infektsiiasyn juqtyrǵannan, virýstyq pnevmoniiamen aýyryp qaitys bolǵan jaǵdaida olardyń otbasyna – 10 mln. teńge kóleminde tólenedi.
Koronavirýstyq infektsiiadan, virýstyq pnevmoniiadan meditsina qyzmetkeriniń qaitys bolý jaǵdailary boiynsha MÁSQ-qa ótinimder túsken joq.
