Soltústik Qazaqstan oblysyna Katardan jetken gýmanitarlyq kómek – jeke qorǵanysh zattary óńirdiń emdeý mekemelerine bólip beriledi, dep habarlaidy SQO Sybailas jemqorlyqpen kúres qyzmeti.
Katar memleketinen 18 túrli jeke qorǵanysh zattary – barlyǵy 30 myńnan astam ónim jetkizildi. Bul kómek oblystaǵy 27 meditsinalyq mekemege bólindi.
«Densaýlyq saqtaý basqarmasy gýmanitarlyq kómekti bólý kezinde emdeý mekemesiniń suranysyn eskergen. Máselen, Covid-19 diagnozy rastalǵan syrqattar jatqan birinshi qalalyq aýrýhanaǵa 30 arnaiy qorǵanysh kostiými, 170 dana hirýrgiialyq kostiým jáne 300 dana qorǵanysh kózildirigi berildi. Budan basqa maskalar da úlestirildi», - delingen vedomstvonyń baspasóz habarlamasynda.
Provizorlyq statsionarlar men jedel járdem qyzmetterine de osyndai kómek kórsetildi. https://www.youtube.com/watch?v=-FWgGs2BUgo
Birer kúnde SQO-ǵa gýmanitarlyq kómek Reseidiń Túmen oblysynan da jetpek. Túmen oblysy qazaqtarynyń ulttyq-mádeni avtonomiiasynyń prezidenti Esenǵali Ibraev óziniń áleýmettik jelidegi paraqshasynda kórshi oblysqa kómektesý úshin meditsinalyq maskalardy, qolǵaptardy, antiseptikterdi satyp alyp jatqandaryn jazdy.
«Muny nege jazyp otyr degen suraqqa jaýap bereiin: áleýmettik jelide bizdiń aqparatty oqyp, Qazaqstannyń kásipkerleri habarlasty, aktsiiaǵa qosylyp, kómekteskileri keletindigin aitty. Olar ókpeni jasandy jeldetý apparattaryn satyp alýǵa qarjy bólýge daiar. Bizdi uiymdastyrýshylyq jumystardy qolǵa alýdy, iaǵni qujattary sai keletin sapaly medtehnikany jetkizýshilerdi taýyp, apparattardy satyp alyp, SQO-ǵa jetkizýdi surady», - deidi Esenǵali Ibraev.
