Ońtústik Afrikada koronavirýstyń jańa Omikron nusqasynyń taralýy týraly derekterdi taldaý barysynda dárigerler onyń SARS-CoV-2 bastapqy nusqasynan eki ese juqpaly, al delta shtamynan 36% jyldam juǵady degen qorytyndy jasady. Taldaý nátijesi medRxiv saitynda jariialandy, dep habarlaidy QazAqparat.
Omikron - koronavirýstyń jańa túri (B. 1.1.529). Ol Ońtústik Afrika men Afrikanyń basqa memleketteriniń aýmaǵynda osy jyldyń kúziniń sońynda tarala bastady. Qazir álemniń 80-nen astam memleketinde anyqtaldy. Ǵalymdardyń pikirinshe, Omikron Delta shtamyna qaraǵanda áldeqaida juqpaly, biraq ázirge dárigerler bul tujyrymdy tolyq rastaý úshin jetkilikti málimetter jinaǵan joq.
Jańa zertteýde Kolýmbiia ýniversitetiniń (AQSh) professory Djeffri Shamannyń basshylyǵymen amerikalyq dárigerler bul olqylyqtyń ornyn toltyrdy. Ǵalymdar Ońtústik Afrikanyń Gaýteng provintsiiasyndaǵy sońǵy birneshe aptadaǵy málimetterdi taldady.
Osy derekterge súiene otyryp, zertteýshiler Ońtústik Afrikada SARS-CoV-2 taralýynyń kompiýterlik modelin qurastyrdy. Onda jergilikti dárigerlerdiń infektsiiany qanshalyqty jii anyqtaǵany, PTR synaqtary jáne virýs úlgilerine genomdyq taldaý júrgizilgeni eskerildi. Shaman men onyń áriptesteri pandemiianyń birinshi jáne keiingi tolqyndary kezinde COVID-19 qozdyrǵyshynyń qalai taraǵanyn salystyrdy.
