Halyqqa keshendi meditsinalyq qyzmet kórsetetin mobildi toptar qashan jumysqa kirisedi? Bul saýalǵa QR Densaýlyq saqtaý vitse-ministri Ajar Ǵiniiat jaýap berdi, dep habarlaidy QazAqparat.
Onyń atap ótýinshe, búkil elimiz boiynsha emhanalar janynan halyqqa meditsinalyq qyzmetterdi keshendi túrde kórsetetin 465 ámbebap mobildi top qurylatyn bolady. Al Nur-Sultan qalasyndaǵy 31 emhana janynan árqaisysynda 2-3-ten mobildi top qurylǵan.
«Jedel járdem stansalarynda da mobildi top qurý úshin kelisimshart jasaý jumystary júrgizilip jatyr. Olar qormen (Mindetti áleýmettik meditsinalyq saqtandyrý qory) kelisimshartqa otyryp, sol mobildi toptardyń jumysyn qamtamamsyz etetin qarajat tabýy kerek. Nur-Sultan qalasynda mobildi toptar kelisimshart jasalǵannan keiin paida bolady», - dedi vitse-ministr Ortalyq kommýnikatsiialar qyzmetindegi brifing barysynda.
Sonymen qatar ol barlyq emhanada ókpe qabynýymen aýyrǵan árbir naýqasqa ýchaskelik dárigerler antibotikter men qyzý túsiretin dárilerdi beretindigin aitty.
«Bul dárilerdi retseptimen aqysyz alýǵa bolady. Ol úshin ýchaskelik dárigerdiń nusqaýy men retsepti kerek», - dedi Ajar Ǵiniiat.
