Áleýmettik meditsinalyq saqtandyrý qory koronavirýs naýqasyn emdeýge arnalǵan tarifter ázirledi, dep habarlaidy QazAqparat.
Bul týraly «Áleýmettik meditsinalyq saqtandyrý qory» KEAQ Basqarma tóraǵasy Bolat Tókejanov aityp berdi.
«Qazir qosymsha 110 mlrd teńge bólý máselesi qarastyrylyp jatyr. Al mindetti áleýmettik meditsinalyq saqtandyrý júiesi aiasynda elimizde qosymsha 140 mlrd teńge bólinedi. Bul esepteýler áli naqtylanatyn bolady, óitkeni olar koronavirýs pen pnevmoniia boiynsha epidemiologiialyq jaǵdaidyń qalai órbitinine tikelei bailanysty», - dedi spiker Ortalyq kommýnikatsiialar qyzmetinde ótken brifingte.
Onyń aitýynsha, Qor KVI diagnostikasyna, emdeýge jáne asqynýlarǵa bailanysty barlyq shyǵyndy meditsinalyq uiymdarǵa óteý úshin emdeýdiń aýyrlyǵyn eskere otyryp, jańa tarifter ázirledi.
«Osylaisha, koronavirýstyq infektsiianyń jeńil deńgeiindegi bir naýqasty emdeý – 292 600 teńge, ortasha deńgeidegi naýqas – 446 100 teńge, aýyr naýqasty emdeý – 1,5 mln teńge. Óte aýyr haldegi naýqasty emdeý úshin Qor bir naýqas úshin 1,7 mln teńge tóleidi», - dedi Bolat Tókejanov.
Spiker jedel járdem kórsetý tarifiniń qurylymynda jeke qorǵaný quraldaryna jumsalatyn shyǵyndardyń orta eseppen 40%-ǵa artqanyn atap ótti.
«Qordyń qosymsha josparlanǵan qarjylandyrý kóleminen mobildi brigadalardyń jumysyna shamamen 7,7 mlrd teńge jiberiledi. Tipti qazir emhanalar men otbasylyq ambýlatoriialar janynan dil osyndai úsh myńnan astam brigada quryldy», - dedi B.Tókejanov.
Buǵan deiin Bolat Tókejanov koronavirýsqa qarsy kúres sharalaryna 56,7 mlrd teńge bólingenin aitty.
