Armeniia Úkimetiniń sheshimimen respýblikada koronavirýsqa bailanysty naýryzda engizilgen tótenshe jaǵdai rejimi taǵy bir aiǵa uzartyldy, dep habarlaidy "Ult aqparat".
Dúisenbi, 13 shildede Armeniia Úkimetiniń kezekten tys otyrysy ótti. Onda TJ rejimin taǵy bir aiǵa - 12 tamyzǵa deiin uzartý týraly sheshim qabyldandy. TJ rejimin uzartý týraly sheshim eldegi koronavirýs infektsiiasynyń taralý uzaqtyǵyna, sondai-aq oǵan qarsy turýdyń tiimdi tetikterin qamtamasyz etý qajettiligine negizdelgen.
Armeniia densaýlyq saqtaý ministrliginiń aýrýdy baqylaý jáne aldyn alý jónindegi ulttyq ortalyǵynyń málimetinshe, elde 32 151 adam koronavirýs iinfektsiiasyn juqtyrǵan. 19 865 patsient saýyǵyp shyqsa, 11 530 naýqas em qabyldaýda. Qaýipti indetten 573 adam kóz jumǵan. COVID-19 diagnozy qoiylǵan taǵy 183 patsient ózge sebepterden qaitys boldy.
Eske sala keteiik, Armeniiada koronavirýs infektsiiasyna bailanysty tótenshe jaǵdai rejimi 16 naýryzda bir aiǵa engizilgen bolatyn. Keiinnen 13 sáýirde Armeniia úkimeti TJ rejimin 14 mamyrǵa deiin, sodan keiin eki ret - 13 maýsymǵa deiin jáne 13 shildege deiin uzartqan edi.
