Berdibek Saparbaev Qordai aýdanynyń ákimi Rústem Dáýletpen birge Qordai aýdanynyń Gvardeisk kentindegi biofarmatsevtikalyq zaýytqa baryp, ondaǵy jumystarmen tanysty, - dep habarlaidy "Ult aqparat".
Ǵylymi-zertteý kesheninde kezekti shtab otyrysy ótip, mańyzdy mindetter talqylandy. Basqosýda zaýyt jumysshylary úshin salynyp jatqan turǵyn úi qurylysynyń qarqynyn arttyrý jaiy da nazarǵa alyndy. Qazirgi ýaqytta ǵylymi mekemege irgeles aýmaqta úsh kóppáterli turǵyn úi salynýda. Merdiger – «BazisDorStroi» JShS.
Qurylysshylardyń aitýynsha, alǵashqy 60 páterli úi aiaqtalýǵa jaqyn. Aldaǵy eki aida ol paidalanýǵa berilmek. «Agrospetsstroi» JShS salyp jatqan qalǵan eki úidi aǵymdaǵy jyldyń qazan aiynda paidalanýǵa berý josparlanǵan.
Sondai aimaq basshysy jumys sapary barysynda Otardaǵy Serik Ermekov basqaratyn «Sulý Tóre» sharýa qojalyǵynyń egistik alqabyna bardy. Sharýa qojalyq – Qordai aýdanynyń iri agroqurylymdarynyń biri. Osydan bes jyl buryn qurylǵan qojalyq negizinen egistikke mamandanǵan. Búginde quramynda 70 adamǵa deiin eńbek etetin sharýashylyqtyń óz kombain jáne traktorlarynan turatyn aýqymdy tehnikalyq parki jasaqtalǵan. Munda qazir zamanaýi sý únemdeý tehnologiialary iske qosylýda. Aǵymdaǵy jyly sharýashylyq eki jańbyrlatqysh qondyrǵy satyp alyp, 200 gektar arpa alqabyn sýarýda.
Berdibek Saparbaev sharýashylyq jumysy týraly oń baǵasyn bildirip, aýdan ákimi Rústem Dáýletke egin sharýashylyǵyna jańa tehnologiialardy keńinen engizýdi, jumys isteýge nietti sharýalarǵa qoldaý kórsetýdi tapsyrdy.
Qordai aýdanynan jumys sapary barysynda aimaq basshysy Eshkili-Qordai sý qoimasyna da arnaiy at basyn burdy. Bir jarym tekshe million tonnaǵa deiin sý jinaýǵa qaýqarly qoimanyń Kenen aýylynyń turǵyndarynyń úi irgesindegi jerlerin sýmen qamtýdaǵy mańyzy zor. Ótken jyly jumyspen qamtýdyń jol kartasy aiasynda munda aǵymdaǵy jóndeý jumystary júrgizilgen. Naqtyraq aitsaq, qubyrlar aýystyrylyp, bóget pen jaǵalaýlary qosymsha nyǵaitylǵan.
