Óziniń tarihi júrip ótken jolynda kóptegen qiynshylyqtarǵa qaramastan bizdiń halyq qamqorlyǵy men janashyrlyǵyn san márte dáleldei alǵan.
Taǵdyr tálkegine ushyrap, qatygez saiasattyń qurbanyna ainalǵan, jer aýdaryp óz elinen jyraqqa tap bolǵan talai ózge ulttardy baýyryna basyp, panalatty. Búginde júz otyzdan astam ulttar men ulystardyń ókilderi Qazaqstandy «otanym» dep jaqsy kórýine, baǵalaýyna túrtki bolyp otyrýynyń ózi qazaq halqynyń qushaǵynyń keńdiginiń arqasy. Qiyn qystaý kezde bir tilim nandy úzip jegen ulttar búginde ósip óngen.
Qazirgi kezde ár ulttar men ulystardyń óz mádeni ortalyqtary, birlestikteri, jastar jobalary jumys isteidi. Olar túrli merekelik is sharalar, forýmdar, dóńgelek ústelder ótkizip turady. Qazaqstan halqy Assambleiasy belsendi qyzmet atqarady. Bul baiyrǵy qonaqjailylyq, turaqtylyq pen tatýlyqty dáripteitin ustanymnyń kórinisi bolsa kerek.
«Birligimiz – áralýandyqta» degen basty qaǵidatymyz eshqashan ózgermeidi», - dep Qazaqstan Respýblikasy Prezidenti Qasym-Jomart Toqaev Qazaqstan halqy Assambleiasynyń «El birligi – jańarǵan Qazaqstannyń tiregi» atty XXXI sessiiasynda aityp ótkendei ishki turaqtylyq, qoǵamdaǵy qaýipsizdik, ózara senim qalyptastyrýdyń joly ártúrli ulttar, dinder, tilderdiń arasynda beibit bailanys ornatý ekeni málim.
