Fotokollaj: Azattyq Rýhy / Ábilqasym Esentaev
Baýyrjan Momyshuly atyndaǵy №5571 áskeri bólimde azamattyq boryshyn óteý barysynda komaǵa túsken qatardaǵy jaýynger Erbaian Muhtardyń isi boiynsha Inga Imanbai jábirlenýshi taraptyń qorǵaýshysy. Ol ózine Erbaiannyń áke-sheshesi habarlasyp, «áskeriler belsendi túrde kómektesip jatyr jáne olar Erbaiandy shetelde emdetý aqysyn tólep, kómektesýge daiyn» degen jalǵan aqparat tarap jatqanyn aityp, bul aqparatqa senbeýge shaqyrdy.
«Erbaiandy emdegen jarty jylda áskeriler tek 100 banka suiyq tamaq ákeldi. Sonymen boldy. Kerisinshe, áskeriler qajetti kómekti kórsetemiz, tek shý kótermeńder dedi, biraq eshqandai kómek kórsetpedi. Dári-dármekter, pamperster, úidegi dárigerlerge aqy tóleý, jalpy, Erbaianǵa kútim jasaýdyń barlyq shyǵyndaryn onyń ata-anasy óz aqshalary men adamdar bergen qarajattan tólep keledi. Memleketten de, áskerilerden de kómek bolǵan joq», - degen I. Imanbai komadaǵy sarbazǵa alty ai ishinde múgedektik berilmegenin aityp otyr.
Inga Imanbai tipti kútim boiynsha járdemaqy da berilmegenin aitty.
«Erbaiannyń ata-anasy páterdiń ipotekasyn tóleidi, tek otaǵasy ǵana jumys isteidi. Olar tipti aqsha únemdeý úshin kishi qyzyn balabaqshaǵa da bermei otyr. Biz barlyq resmi aqparatty tek @erbayan2024 paraqshasynan kórýdi suraimyz, bárimiz osynda jazamyz. Ákesiniń aitýynsha, qazir áskeriler bailanysqa shyǵyp, úige massaj terapevtin shaqyrýǵa ýáde berdi. Olar sondai-aq Germaniiada Erbaiandy emdeýge kómektesýge ýáde beredi, biraq kafedra stýdentteri operatsiia jasaidy dedi. Erbaiannyń ata-anasy olardyń kómeginen bas tartty», -deidi ol áleýmettik jelidegi paraqshasynda.
Buǵan deiin Inga Imanbai Erbaiannyń aýrýhanadan shyǵarylǵanyn aitqan. Qazir áleýmettik jeli arqyly Erbaian Muhtardyń emine dep aqsha jinalyp jatyr. Sarbazdyń anasy ony shetelde emdetýge nietti.
Aita keteiik 21 tamyzda QR IIM Ulttyq ulannyń baspasóz qyzmeti sarbazdyń densaýlyǵyna qatysty resmi málimdeme jasady degen aqparat shyqqan. Onda qazirgi ýaqytta barlyq qajetti saraptamalar taǵaiyndalǵany, sotqa deiingi tergeý jalǵasyp jatqany aitylǵan.
«Tergeý barysy QR IIM ÁTD basshylyǵynyń baqylaýynda. Qatardaǵy jaýynger E.Muhtardyń ata-anasynyń talaby boiynsha ońaltý em-sharalary aiaqtalǵannan keiin úiine shyǵarylǵanyn habarlaimyz. Sonymen qatar, Densaýlyq saqtaý ministrliginiń emdeý mekemesi QR IIM Ulttyq ulanynyń áskeri-meditsinalyq basqarmasymen birlesip oǵan múgedektikti rásimdeý boiynsha kómek kórsetedi», - delingen habarlamada.
Sonymen qatar habarlamada Behterev atyndaǵy psihiatriia jáne nevrologiia ulttyq meditsinalyq ǵylymi ortalyǵyna, Kirov áskeri-meditsinalyq akademiiasyna jáne Resei Federatsiiasynyń Polenov atyndaǵy Resei ǵylymi-zertteý neirohirýrgiialyq institýtyna, sondai-aq keńes berý jáne gospitalizatsiia máselesin qarastyrý úshin Túrkiia elshiligine hat joldanǵany aitylǵan.
Qatardaǵy jaýynger Erbaian Muhtardyń bas jaraqatyn alý faktisi boiynsha QR QK 440-baby 4-tarmaǵynyń 3-bóligine sai «Áskeri qyzmetshiler arasyndaǵy ózara qarym-qatynastardyń jarǵylyq erejelerin buza otyryp, densaýlyqqa aýyr ziian keltirý» baby boiynsha qylmystyq is qozǵalǵany habarlanyp otyr.
Buǵan deiin Bas áskeri prokýratýra da sotqa deiingi tergep-tekserý júrip jatqanyn málimdegen.
Erbaian Muhtar byltyr mamyrda merzimdi áskeri qyzmetke alynǵan. Áskeri bólim ony 2023 jyly 4 jeltoqsan kúni túnde óz boryshyn atqaryp jatqan bóliminde dárethanadaǵy kafelge qulap, bas-miynyń ashyq jaraqatyn alǵan degen.
Meditsinalyq anyqtama boiynsha sarbazdyń bas súiegi jarylyp, jelke súiegi synǵan, aýyr mi jaraqatyn alǵan. Alaida Erbaian Muhtardyń anasy Gúlsim Qamieva «balasy ózi basyn kafelge soǵyp alǵannan jaraqat aldy» degenge senbeitinin aitqan. Ol óz sózinde uly bir ret komadan oianyp, óziniń soqqyǵa jyǵylǵanyn rastaǵan, biraq keiin dárigerler Gúlsim Qamievaǵa aitpai Erbaianǵa ota jasap, miynyń jartysyn alyp tastaǵan.
Aita keteiik, Qazaqstanda áskerdegi álimjettikke qatysty buǵan deiin de rezonansty oqiǵalar bolǵan. Inga Imanbai resmi statistika boiynsha jyl saiyn ondaǵan qazaqtyń jas jigitteri áskerde ne qaza tabady, ne soqqyǵa jyǵylyp jarymjan kúide úiine qaitady dep otyr.
«2022 jyly 4 maýsym kúni prezident Toqaev arnaiy málimdeme jasap, áskerdegi álimjettikti, ólimdi toqtatý kerek degen tapsyrma berdi. Sol jyly 7 maýsym kúni Qorǵanys ministrligi tipti arnaiy baǵdarlama qabyldady. Biraq sodan beri 2 jyl ótti. 2023-2024 jyldardaǵy statistika ózgergen joq. Áskerde qazaqtyń balalary soqqyǵa jyǵylyp ólip jatyr», - deidi quqyqqorǵaýshy áleýmettik jelidegi paraqshasynda.
